हेटौँडा ः लागूऔषध खैरो हेरोइनसहित ७ जनालाई मकवानपुर प्रहरीले बिहीबार पक्राउ गरेको छ । बिहीबार राती ९ बजेको समयमा हेटौँडा–१७, हटियाबाट २ जना र बिहीबार दिउँसो ३ बजेको समयमा हेटौँडा–२, पुरानो मकवानपुररोडबाट ५ जनालाई पक्राउ गरिएको जिल्ला प्रहरी कार्यालय मकवानपुरले जानकारी दिएको छ ।
हेटौँडा–१७, हटिया दाबिलेबाट २ ग्राम ५४० मिलिग्राम खैरो हेरोइनसहित ३२ वर्षीय विदन कुमार भुजेल र बारा जिल्लाको विश्रामपुर गाउँपालिका–८, नकाटुवा टोलका २१ वर्षीय शेख आजादलाई पक्राउ गरिएको प्रहरीले जनाएको छ ।
यस्तै ४ ग्राम खैरो हेरोइनसहित हेटौँडा–२, पुरानो मकवानपुररोडस्थित शिशिर राजथलाको घरबाट ३१ वर्षीय शिशिर राजथला, ३० वर्षीय निरन श्रेष्ठ, ३५ वर्षीय सुदिप भुर्तेल, हेटौँडा–४ का ३० वर्षीय असिम कुमार बर्तौला र हेटौँडा–१ का ३० वर्षीय ओम साहलाई प्रहरीले पक्राउ गरेको छ । सातै जनालाई मकवानपुर जिल्ला अदालतबाट ७ दिनको म्याद लिएर हिरासतमै राखी अनुसन्धान गरिरहेको प्रहरीले जानकारी दिएको छ ।
