हेटौंडाः आनन्द मार्ग प्रचारक संघ नेपाल तथा आमसाई स्कुल हेटौंडाको संयुक्त आयोजनामा शनिबार हेटौंडा–४, कर्राचोकमा रक्तदान कार्यक्रम भएको छ । कार्यक्रममा ३६ जनाले रक्तदान गरेका छन् ।
हेटौंडामा रगतको अभाव भइरहेको अवस्थामा रक्तदान कार्यक्रमको आयोजना गरिएको हो । रक्तसञ्चार केन्द्र हेटौंडाको प्राविधिक सहयोगमा कार्यक्रम भएको थियो । रक्तदान कार्यक्रमसँगै योग जनचेतना कार्यक्रम पनि गरिएको आमसाई स्कुलका प्रध्यानाध्यापक प्रभात खत्रीले जानकारी दिनुभयो । हेटौंडा–४, कर्रामा रहेको आमसाई स्कुलमा अध्ययनरत विद्यार्थीले योग गर्नुका साथै योग र स्वास्थ्यसँग सम्बन्धित जनचेतनामूलक प्ले कार्डहरु बनाएका थिए ।
हेटौंडा उपमहानगरपालिका ४ नम्बर वडाका अध्यक्ष नवीन सिग्देलको प्रमुख आतिथ्य तथा आनन्द मार्ग प्रचारक संघ नेपाल शाखा मकवानपुरकी सभापति कोपिला श्रेष्ठको सभाध्यक्षतामा उद्घाटन कार्यक्रम भएको हो ।
