हेटौंडाः मकवानपुरका साहित्यकार निमेष निखिल सम्मानित हुनुभएको छ । विराटनगरमा शनिबार निमेष निखिललाई कृष्णभूषण बल स्मृति सृजना युवा पुरस्कारबाट सम्मान गरिएको हो ।
११ हजार एक सय ११ रुपैयाँ नगदसहित निखिललाई सम्मानपत्र प्रदान गरिएको छ । सर्जक सञ्जाल मकवानपुर तथा साहित्य संगम मकवानपुरका अध्यक्ष समेत रहनुभएका निमेष निखिल मकवानपुर बहुमुखी क्याम्पसमा नेपाली विषयका उपप्राध्यापक समेत हुनुहुन्छ ।
नेपाली साहित्यमा कविता लेखनमा योगदान पुर्याएको भन्दै निमेष निखिललाई सम्मान गरिएको हो । निमेष निखिलका ‘मनहरुको परिषर’, ‘उमेरको नदी’ र ‘शोकगीतको पोष्टमार्टम’ कविता कृति प्रकाशित छन् । पुरस्कार वितरण समारोहमा मकवानपुरे कवि निमेष निखिलको व्यक्तित्वका बारेमा कवि सुमन पोखरेलले चर्चा गर्नुभएको थियो ।
कृष्णभूषण बल स्मृति प्रतिष्ठानले निमेष निखिलसँगै कथाकार भागिरथी श्रेष्ठलाई कृष्णभूषण बल सृजना पुरस्कार तथा कवि एवम् गजलकार कविराज पोखरेललाई कृष्णभूषण बल सृजना सम्मानबाट सम्मानित गरिएको थियो ।
