हेटौंडाः हेटौंडा–१ स्थित अमर माध्यमिक विद्यालयमा दोस्रो खाना महोत्सव तथा सांस्कृतिक कार्यक्रम सम्पन्न भएको छ । खाना महोत्सवमा कक्षा ७ देखि ९ सम्मका विद्यार्थीको ७ वटा समूहले तयार पारेको मौलिक खानाको परिकार राखिएका थियोे ।
लगानीको आधारमा सबैभन्दा धेरै नाफा कामाएर श्री गणेश भोजनालय समूह प्रथम भएको छ । टम एण्ड जेरी समूह दोस्रो र मन्चुरी खाजाघर तेस्रो भएको हो । महोत्सवमा प्रथम, द्वितीय र तृतीय हुने विद्यार्थी समूहलाई पुरस्कार वितरण गरिने विद्यालयका प्रधानाध्यापक मालती उप्रेतीले जानकारी दिनुभयो ।
खाना महोत्सवसँगै गायन, नृत्यलगायत विभिन्न सांस्कृतिक प्रस्तुति गरिएको थियो । विद्यालय व्यवस्थापन समितिका अध्यक्ष जानकी गिरीको सभाध्यक्ष तथा १ नम्बर वडा अध्यक्ष सविन न्यौपानेको प्रमुख आतिथ्यमा कार्यक्रम सञ्चालन भएको हो ।
स्थानीय पाठ्यक्रमको उद्देश्य पूरा गर्न, बालकालिकामा अन्तरनिहीत प्रतिभा प्रस्फुटन गर्न र व्यापारिक सीपको विकास गर्ने उद्देश्यले सांस्कृतिक कार्यक्रम तथा खाना महोत्सव आयोजना गरेको प्रधानाध्यापक उप्र्रेतीले बताउनुभयो । विद्यालयमा हाल करिब ७ सय जना विद्यार्थी अध्यनरत छन् ।
