हेटौँडाः हेटौँडा–६, चौघडास्थित प्रज्वल शिक्षा सदन इंग्लिस स्कूलको अभिभावक दिवस शनिबार भएको छ । विद्यालय व्यवस्थापन समितिका अध्यक्ष शम्भु रिमालको अध्यक्षता तथा वडा अध्यक्ष विष्णुबहादुर दाहालको प्रमुख आतिथ्यमा अभिभावक दिवस मनाइएको हो । अभिभावक दिवसको अवसरमा विद्यालयले अभिभावकलाई सम्मान गरेको छ ।
आफ्ना बाबुनानीलाई नियमितरुपमा पोषिलो खाजा पठाउने सुमित्रा विष्ट, सुनिता थापा र अमृत थापालाई विद्यालयले सम्मान गरेको छ । बालबालिकाको सरसफाईमा ध्यान दिने अभिभावक शान्ता आले र कोपिला पौडेलसँगै नियमित शूल्क बुझाउने पूर्ण कुमारी बस्नेत, रिता गुरुङ र अनिषा घिसिङलाई पनि सम्मान गरिएको छ । विद्यालय उत्कृष्ट शिक्षकको रुपमा इरा गुरुङलाई सम्मान गरेको छ । अभिभावक दिवसमा विद्यार्थीले नृत्य, गायन कला प्रस्तुत गरेका थिए ।
विद्यालयले वार्षिक खेलकुद कार्यक्रमअन्तर्गत फागुन १ गते र फागुन ३ गते विविध खेलकुद कार्यक्रम गरेको थियो । खेलकुद प्रतियोगितामा विजयी विद्यार्थीलाई अभिभावक दिवसको अवसरमा पुरस्कृत गरिएको छ । विद्यालयले बस चालक, सहचालक, कार्यालय सहयोगीलाई पनि सम्मान गरेको छ । गुठी मार्फत सञ्चालित विद्यालयमा ५ कक्षासम्म पठनपाठन हुन्छ । अहिले एक सय ५१ जना विद्यार्थी अध्ययनरत छन् । विद्यालयका प्रिन्सीपल गणेशकुमार श्रेष्ठले विद्यालयको वस्तुस्थितिबारे जानकारी गराउनुभएको थियो ।
