हेटौंडाः हेटौंडा उपमहानगरपालिकामा गत आर्थिक वर्षमा ६ वटा बचत तथा ऋण सहकारी संस्थाहरु एकीकरण भएका छन् । विभिन्न वडाहरुका ६ वटा सहकारीहरु एकीकरण भएर ३ वटा भएका हुन् । उपमहानगरपालिकाले चालु आर्थिक वर्षमा पनि तीनै तहको सरकारको सहकारी ऐन र नियमावली अनुसार एकीकरणलाई जोड दिइने हेटौंडा उपमहानगरपालिकाका सूचना अधिकारी रामकृष्ण थापाले जानकारी दिनुभयो ।
गत आर्थिक वर्षमा हेटौंडा उपमहानगरपालिका वडा नम्बर ११ मा रहेको उपयोगी बचत तथा ऋण सहकारी संस्था र सहश्राब्दी बचत तथा ऋण सहकारी संस्था एकीकरण भएर उपयोगी सहश्राब्दी बचत तथा ऋण सहकारी संस्था भएको छ । त्यस्तै हेटौंडा १० मा रहेको श्रमिक बचत तथा ऋण सहकारी संस्था र हेटौंडा–४ को मखमली बचत तथा ऋण सहकारी संस्था एकीकरण भएर हेटौंडा-१० मा श्रमिक बचत तथा ऋण सहकारी संस्था दर्ता भएको छ । हेटौंडा–८ को सर्वोत्तम र हेटौंडा–१० को सञ्चिती बचत तथा ऋण सहकारी एकीकरण भएर हेटौंडा–८ मा सर्वोत्तम सञ्चिती बचत तथा ऋण सहकारी संस्था दर्ता भएको छ । चालु आर्थिक वर्षमा हेटौंडा उपमहानगरपालिकाले नयाँ सहकारी दर्ता नगर्ने र एकीकरणलाई नै जोड दिइने उपमहानगरपालिकाका सूचना अधिकारी रामकृष्ण थापाले बताउनुभयो । उपमहानगरपालिकाले सहकारी नियमावली २०७७ पनि जारी गरिसकेको छ ।
हेटौंडा उपमहानगरपालिकाले गत आर्थिक वर्षमा सहकारीका लागि १६ लाख बजेट विनियोजन गरेको थियो । चालु वर्षमा भने १४ लाख बजेट विनियोजन गरेको छ । उपमहानगरको गत आर्थिक वर्षमा सहकारीतर्फ विभिन्न ७ वटा योजनाहरु पुरा भई भौतिकतर्फ ८७ दशमलव ५ प्रतिशत र वित्तियतर्फ ७५ दशमलव ५ प्रतिशत प्रगति भएको उपमहानगरपालिकाले समीक्षा गरेकोे छ । उपमहानगरपालिकाले गत आर्थिक वर्षमा विभिन्न सहकारीका कम्प्युटर जान्ने २५ जना कर्मचारीहरुलाई जिल्ला बचत तथा ऋण सहकारी संघको समन्वयमा कोपोमिस तालिम प्रदान गरेको छ । उपमहानगरपालिकाले ३१ वटा सहकारी संस्थाहरुको विनियम संशोधन गर्नुका साथै सम्पूर्ण सहकारीहरुको वार्षिक साधारण सभा र प्रतिवेदन नियम अनुसार व्यवस्थित बनाउदै लगेको बताइएको छ ।
उपमहानगरपालिकाले पालिका भित्रका विभिन्न सहकारीमा आवद्ध कर्मचारी र व्यवस्थापक गरी ८५ जनालाई कोपोमिस सफ्टवेयर, लेखा तालिम र व्यवस्थापन तालिम प्रदान गरेको हेटौंडा उपमहानगरपालिकाका सूचना अधिकारी थापाले बताउनुभयो । गत आर्थिक वर्षमा उपमहानगरपालिकाले २५ वटा सहकारीहरुको अनुगमन गरेको छ । त्यस्तै हेटौंडा उपमहानगरपालिकाले सहकारी संस्थाहरुमा आवद्ध सदस्यहरुको रकमको सुरक्षा, उपयोगिता, उत्पादनशील काममा लगानी र व्यावसायिकताका साथै सहकारी संस्थाहरुको विकासका लागि पटक-पटक छलफल गरेको बताएको छ ।
हेटौंडा उपमहानगरपालिकामा हाल २ सय २५ वटा विभिन्न विषयका सहकारी संस्थाहरु रहेका छन् । उपमहानगरमा बचत तथा ऋण १ सय, बहुउद्देश्यीय सहकारी २९ वटा, उपभोक्ता सहकारी १६ वटा, कृषिसँग सम्बन्धित सहकारीहरु ६९ वटा र अन्य ११ वटा सहकारीहरु रहेका छन् । संघीय सरकारको नियमावली अनुसार बचत तथा ऋण सहकारी संस्थाको हकमा एउटा वडामा ५ हजार जनसंख्या बराबर एउटा सहकारी संस्था हुनुपर्ने, एक वडामा एक विषयगत सहकारी मात्र हुनुपर्ने, एक शेयर सदस्य एक विषयगत सहकारीमा मात्र आवद्ध हुनुपर्ने लगायतको कानून रहेको छ । यि कुराहरुको व्यवस्थापन गर्नको लागि उपमहानगरपालिकाले एकीकरणलाई जोड दिएको हो ।
