हेटौँडा : शिक्षकहरुको आन्दोलनमा नेपाली काँग्रेस बागमती प्रदेश समितिले ऐक्यवद्धता जनाएको छ । नेपाली काँग्रेस बागमती प्रदेश समितिका सभापति इन्द्रबहादुर बानियाँले शनिबार अपील जारी गर्नुहुँदै शिक्षकहरुको आन्दोलनमा ऐक्यवद्धता जनाउनुभएको हो ।
सभापति बानियाँले सरकारले शिक्षकहरुसँग विगतमा गरेका सहमति र शिक्षकहरुको जायज माग सम्बोधन गर्न आग्रह गर्नुभएको छ । उहाँले शिक्षक तथा विद्यालय कर्मचारीहरुसँग विगतमा भएका सहमति कार्यान्वयन गर्न सरकारलाई आग्रह गर्नुभएको छ । ‘नेपाल शिक्षक महासंघले जारी राखेको आन्दोलनप्रति नेपाली कांग्रेस बागमती प्रदेश कार्यसमितिको पूर्ण ऐक्यवद्धता रहेको छ’, अपीलमा उल्लेख छ, ‘शिक्षक तथा विद्यालय कर्मचारीहरुसँग विगतमा भएका सहमति कार्यान्वयन गर्न नेपाल सरकारलाई आग्रह गर्दछौं । शिक्षा क्षेत्रको उन्नति लोकतन्त्रको आधार हो । यसप्रति नेपाली काँग्रेस बागमती प्रदेश कार्यसमिति प्रतिबद्ध रहेको र सरकारलाई शिक्षक महासंघले उठाएका जायज मागहरुलाई वार्ता मार्फत तत्काल समाधान दिन आग्रह गर्दछ ।’
नेपाल शिक्षक महासंघद्वारा विद्यालय शिक्षा ऐन जारीको माग गर्दै केहीदिनदेखि काठमाडौं केन्द्रित अनिश्चितकालिन आन्दोलनलाई सरकारले वार्तका माध्यमबाट व्यवस्थापन गर्नुपर्ने विज्ञप्तीमा भनिएको छ । शिक्षक तथा विद्यालय कर्मचारीका यथोचित माग समाधान गरी गुणस्तरीय विद्यालय शिक्षाको प्रवन्ध गर्नसक्ने ऐन जारी गर्न ढिलाई गर्न नहुने अपीलमा उल्लेख छ ।
