हेटौँडा : गर्मी तथा सुक्खायाम लागेसँगै आगलागीका घटनाबाट ठूलो धनजनको क्षति हुने क्रम बढेको छ । जंगलमा लागेको आगोबाट शुक्रबार एकैदिन मकवानपुरको राक्सिराङ गाउँपालिकाको ३ घर, हेटौँडा, बागमती र इन्द्रसरोवर गाउँपालिकाको एक–एक घरमा आगलागी भएको छ । आगलगीबाट १३ लाख बराबरको क्षति भएको छ भने मानवीय तथा चौपाय क्षति नभएको बागमती प्रदेश प्रहरी कार्यालय हेटौँडाले जानकारी दिएको छ ।
राक्सिराङ गाउँपालिका–७, चरिमारामा सुब्बा प्रजा र चन्द्र प्रजाको घरमा आगलागी भएको छ । शुक्रबार बिहान ९ बजेको समयमा भएको आगलागीबाट सुब्बा र चन्द्रको घरमा ३ लाख रुपैयाँ बराबरको क्षति भएको प्रहरीले जानकारी दिएको छ । आगलागीबाट सुब्बा र चन्द्रको घर भित्र रहेको लत्ताकपडा, भाडावर्तन, अन्नपात र नगद जलेर पूर्णरुपमा नष्ट भएको छ । आगलागीबाट मानवीय तथा चौपाया क्षति भने क्षति भएको छैन । स्थानीयको सहयोगमा बिहान १० बजेर २० मिनेटको समयमा आगो पूर्णरुपमा नियन्त्रणमा लिएको प्रहरीले जनाकारी दिएको छ ।
राक्सिराङ गाउँपालिका–४, तार्सिकोट रेनामा राम बहादुर थिङको १ तल्ले कच्ची घरमा आगोलागी भएको छ । शुक्रबार बिहान ११ बजेर ३० मिनेटको समयमा भएको आगलागीबाट एक लाख ५० हजार रुपैयाँ बराबरको क्षति भएको प्रहरीले जानकारी दिएको छ । आगोलागीबाट घरमा रहेका अन्नपात, लत्ताकपडा, भाँडाकुँडा र सोलार प्यानल जलेर पूर्णरुपमा नष्ट भएको छ । स्थानीयको सहयोगमा दिउँसो १२ बजेर २० मिनेटको समयमा आगो पूर्णरुपमा नियन्त्रणमा लिएको छ ।
राक्सिराङ गाउँपालिका–५, चंगरङमा रोशन प्रजाको घरमा आगोलागी भएको छ । शुक्रबार दिउँसो २ बजेर ३० मिनेटको समयमा प्रजाको घरमा लागेको हो । आगोलागीबाट २ लाख बराबरको क्षति भएको प्रहरीले जानकारी दिएको छ । आगोलागीबाट घरभित्र रहेका अन्नपात, लत्ताकपडा, भँडाकुँडा र काठपात जलेर पूर्णरुपमा नष्ट भएको छ । स्थानीयको सहयोगमा दिउँसो ३ बजेर ३० मिनेटको समयमा आगो पूर्णरुपमा नियन्त्रणमा लिएको प्रहरीले जनाएको छ ।
यस्तै मकवानपुरको बागमती गाउँपालिका–७, ठूलोथलीमा निज बहादुर थापाको घरमा आगलागी भएको छ । शुक्रबार दिउँसो १२ बजेर ३० मिनेटको समयमा थापाको १ तल्ले कच्ची घरमा अचानक आगलागी हुँदा २ लाख ५० हजार रुपैयाँ बराबरको क्षति भएको प्रहरीले जानकारी दिएको छ । आगलागीबाट थापाको घरभित्र रहेको अन्नपात, लत्ताकपडा, भँडाकुँडा र काठपात जलेर पूर्णरुपमा नष्ट भएको छ । स्थानीयको सहयोगमा दिउँसो ३ बजेर ३० मिनेटको समयमा आगो पूर्णरुपमा नियन्त्रणमा लिएको प्रहरीले जनाएको छ ।
मकवानपुरको ईन्द्रसरोवर गाउँपालिका–३, भालुडाँडामा वनमा लागेको डँढेलोले स्थानीय मिठ्ठु सिलवालको घर र वेदबहादुर सिलवालको गोठमा आगलागी भएको छ । शुक्रबार दिउँसो ३ बजेको समयमा भएको आगलागीबाट ३ लाख ८० हजार रुपैयाँ बराबरको क्षति भएको प्रहरीले जानकारी दिएको छ । आगलगीबाट मिठ्ठु र वेद बहादुरको घर र गोठ पूर्णरुपमा नष्ट भएको छ ।
हेटौँडा–१५, रिद्दिसिद्दी सिमेन्ट उद्योगको बाहिरी कम्पाउण्डमा राखेको कोईलामा आगलागी भएको छ । शुक्रबार राती ८ बजेर ३० मिनेटको समयमा अचानक आगलागी भएको प्रहरीले जानकारी दिएको छ । आगो हेटौँडा उपमहानगरपालिकाको दमकल र प्रहरी टोलीले निभाएको छ । आगोलागीबाट मानवीय, चौपाय तथा भैतिक संरचनाको क्षति भएको छैन ।
