हेटौंडाः हेटौंंडा–४ स्थित आधुनिक राष्ट्रिय माध्यमिक विद्यालयले मंगलबार विद्यार्थीहरुलाई छात्रवृत्ति तथा पुरस्कार वितरण गरेको छ । कक्षा १ देखि ८ सम्मका ४ सय १४ जना छात्राहरुलाई ४ सयका दरले र कक्षा १ देखि १० सम्मका ८९ जना दलित विद्यार्थीलाई पनि ४ सयका दरले छात्रवृत्ति हस्तान्तरण गरिएको छ ।
छात्रवृत्ति वितरण कार्यक्रममा प्रमुख अतिथि हेटौंडा उपमहानगरपालिकाका मेयर हरिबहादुर महतले कुनै पनि विद्यालयका विद्यार्थीले आर्थिक अभावले पढाई छाड्नु नपर्ने बताउनुभयो । उहाँले आर्थिक अवस्था कमजोर भएका कारण पढाई छाड्नुपर्ने अवस्था आएमा उपमहानगरपालिकाले सहयोग गर्ने बताउनुभयो ।
विद्यालय व्यवस्थापन समिति अध्यक्ष चित्तबहादुर विकको सभाध्यक्षतामा भएको कार्यक्रममा विद्यालय व्यवस्थापन समितिका सदस्यहरु, शिक्षक अभिभावक संघका पदाधिकारी, विद्यालयका प्रधानाध्यापक वीरवंश बैठा तथा शिक्षकहरुको उपस्थिति थियो । विद्यालयले छात्रवृत्तिबापत ५ सय ३ जना विद्यार्थीलाई २ लाख १ हजार २ सय रुपैयाँ वितरण गरेको हो । कार्यक्रममा विद्यालयले आयोजना गरेको अतिरिक्त क्रियाकलापअन्तर्गत् नृत्य प्रतियोगितामा प्रथम, द्वितीय र तृतीय भएका विद्यार्थीहरुलाई पुरस्कारसमेत प्रदान गरिएको थियो ।
