हेटौँडाः मकवानपुर प्रहरीले हेटौँडा–१०, बसपार्कबाट लागुऔषध गाँजासहित २ जनालाई पक्राउ गरेको छ ।
मंगलबार बिहान ७ बजेको समयमा चितवनबाट बीरगंजतर्फ जाँदै गरेको ना ६ ख ३५५७ नम्बरको बसलाई रोकी सुरक्षाजाँच गर्दा ५ केजी लागुऔषध गाँजासहित मकवानपुर जिल्लाको राक्सिराङ गाउँपालिका–१, सानोभावरका १९ बर्षीय विजय तामाङ र रौतहट जिल्लाको वृन्दावन नगरपालिका–१ का ३५ वर्षीय धर्मेन्द्र ठाकुरलाई प्रहरीले नियन्त्रणमा लिएको जनाएको छ । लागुऔषध तस्करी भइरहेको भन्ने सूचनाको आधारमा प्रहरीले सुरक्षाजाँच गरेको जनाएको छ । प्रहरीले तामाङ र ठाकुरलाई हिरासतमा राखी थप अनुसन्धान गरिरहेको जनाएको छ ।
