हेटौंडाः मनमोहन यु–१६ क्रिकेट प्रतियोगिताका लागि नेपाल क्रिकेट एसोसिएसनले पुरुष टिम घोषणा गरेको छ । आज माघ २८ गतेदेखि फागुन ६ गतेसम्म पोखरामा हुने मनमोहन क्रिकेट प्रतियोगिताका लागि बागमती प्रदेशको टिममा सहभागी १४ जनाको नाम घोषणा गरिएको हो ।
प्रतियोगितामा मकवानपुरबाट रोहित ठकुरी र शिवशक्ति महतो छनोट भएका छन् । प्रदेशको ६ वटा जिल्लाबाट सहभागी हुन आएका खेलाडीहरुमध्ये अन्तिम १४ जनाको नाम घोषणा गरेको हो । बागमती प्रदेशको टिम कप्तानको जिम्मेवारी सूर्यान्स कोइरालालाई दिइएको छ । रोहित शर्माले विकेट किपरको भूमिका निर्वाह गर्नुहुनेछ । बागमती प्रदेश क्रिकेट संघले ३ दिनको मैत्रीपूर्ण क्रिकेट प्रतियोगिता गराएर १४ जना खेलाडीको नाम सार्वजनिक गरेको हो ।
गतवर्ष भएको विद्यालयस्तरीय क्रिकेट प्रतियोगितामा खेलाडीहरुको प्रदर्शनीको आधारमा मकवानपुरबाट १६ जना छनोट गरेर प्रदेशमा पठाइएको जिल्ला क्रिकेट संघका सदस्य संजोक पोखरेलले बताउनुभयो । मकवानपुरका यु–१६ का खेलाडीहरुलाई बन्द प्रशिक्षणमा सहभागी गराएर तक्षक सिम्खडाले प्रशिक्षण दिएपछि प्रदेश पठाइएको उहाँले बताउनुभयो ।
