हेटौंडाः क्रिकेट खेलका अन्तर्राष्ट्रिय खेलाडी मकवानपुरका राम नरेश गिरीको नेतृत्वमा मकवानपुरमा क्रिकेट एकेडेमी स्थापना भएको छ । मंगलबार एक कार्यक्रमका बीच राम नरेश गिरीको अध्यक्षतामा गठन गरिएको मकवानपुर क्रिकेट एकेडेमीको उद्घाटन गरिएको छ ।
नेपाल क्रिकेट संघको केन्द्रीय समिति सदस्य करण महत्राले मंगलबार हेटौंडा–४, हुप्रचौरमा एकेडेमीको उद्घाटन गर्नुभयो । राष्ट्रिय टिममा मकवानपुरका खेलाडीको सहभागिता बढाउन क्रिकेटका सिनियर खेलाडीको सहभागितामा एकेडेमी स्थापना गरिएको गिरीको भनाइ छ । विशेषगरी उमेर समूहका खेलाडी तयार पार्नुपर्ने औँल्याउनुहुँदै गिरीले भन्नुभयो, ‘उमेर समूहको राष्ट्रिय टिममा मकवानपुरका खेलाडी चयन हुन नसकेको धेरै भइसक्यो । उमेर समूहको राष्ट्रिय टिममा मकवानपुरको खेलाडीको सहभागिता बढाउनकै लागि पनि हामीले एकेडेमी स्थापना र सञ्चालन गर्ने निर्णय गरेका छौं ।’ जिल्ला, प्रदेश हुँदै राष्ट्रिय प्रतियोतिगाका लागि राम्रा खेलाडी उत्पादन गर्न एकेडेमीको स्थापना महत्वपूर्ण हुने गिरीले बताउनुभयो ।
एकेडेमीमा अहिले नयाँ र पुराना गरी २५ जना खेलाडी आवद्ध भइसकेको एकेडेमीका सचिव प्रेम क्षेत्रीले जानकारी दिनुभयो । एकेडेमीले हेटौंडाको हुप्रचौरमा दैनिकरुपमा बिहान र दिउँसो प्रशिक्षण सञ्चालन गर्ने बताइएको छ । बिहान र दिउँसो २ घण्टाका दरले प्रशिक्षण गराउने सचिव क्षेत्रीले बताउनुभयो । अहिले पुरुष खेलाडीलाई मात्रै प्रशिक्षण दिन सुरु गरेको एकेडेमीले छिट्टै महिला खेलाडीलाई पनि प्रशिक्षण सञ्चालन गर्ने बताइएको छ ।
एकेडेमीलाई व्यावसायिक बनाएर नयाँ खेलाडी उत्पादनमा ध्यान दिन नेपाल क्रिकेट संघका केन्द्रीय सदस्य महत्राले बताउनुभयो । मकवानपुर क्रिकेट एकेडेमीको उपाध्यक्षमा सुरेन्द्र अधिकारी, सचिवमा प्रेम क्षेत्री, कोषाध्यक्षमा रविन गुरुङ रहनुभएको छ । यस्तै सदस्यमा विनोद लामिछाने, मनोज खड्का, विवेक दाहाल, अमित राई र सन्देश ढकाल चयन हुनुभएको छ । एकेडेमी उद्घाटन कार्यक्रममा मकवानपुर जिल्ला क्रिकेट संघका अध्यक्ष बासुलाल श्रेष्ठ, मकवानपुर जिल्ला खेलकुद विकास समितिका पूर्वउपाध्यक्ष दिपेन्द्र ढकालको पनि उपस्थिति रहेको थियो ।
