हेटौँडा ः पूर्व–पश्चिम राजमार्गअन्तर्गत मकवानपुरको मनहरीमा भएको सवारी दुर्घटनामा परेर घाइते भएका थप एक जनाको मृत्यु भएको हो । दुर्घटनामा घाइते भएका मध्ये थप एक जनाको उपचारको क्रममा मृत्यु भएको जिल्ला प्रहरी कार्यालय मकवानपुरले जनाएको छ ।
योसँगै शनिबार दिउँसो १ बजे भएको दुर्घटनामा परेर मृत्यु हुनेको संख्या २ पुगेको छ । दुर्घटनामा घाइते भएकी राप्ती नगरपालिका–२ की सुनिता श्रेष्ठको मृत्यु भएको जिल्ला प्रहरी कार्यालय मकवानपुरका प्रवक्ता एवम् प्रहरी नायव उपरीक्षक श्यामु अर्यालले जानकारी दिनुभयो । सुनिताको उपचारको क्रममा चितवन मेडिकल कलेज भरतपुरमा साँझ ५ बजेर ४४ मिनेटको समयमा मृत्यु भएको हो । यसअघि दुर्घटनामा परेर उपचारको क्रममा हेटौंडा–४ का सुरेन्द्रलाल श्रेष्ठको मृत्यु भएको थियो ।
शनिबार दिउँसो १ बजेको समयमा मनहरी गाउँपालिका–६, डिपार्टमा स्कर्पियो र कार आपसमा ठोक्किँदा भएको दुर्घटनामा १४ जना घाइते भएका थिए । प्रहरी नायव उपरीक्षक अर्यालका अनुसार वीरगन्जबाट चितवनतर्फ जाँदै गरेको बागमती प्रदेश ०१–०२६ च ५२५० नम्बरको स्कार्पियो र चितवनबाट हेटौँडातर्फ आउँदै गरेको बा १६ च ८३२४ नम्बरको कार एक आपसमा ठोक्किएर दुर्घटना भएको थियो ।
दुर्घटनामा अन्य १२ जना घाइते भएका छन् । उनीहरुको चितवनस्थित विभिन्न अस्पतालहरुमा उपचार भइरहेको प्रहरीले जनाएको छ । दुर्घटनापछि स्कार्पियो चालक रौतहट घर भई हाल वीरगंज बस्ने किशन जैशवाल फरार रहेका छन् । उनको खोजी कार्य भइरहेको प्रहरी प्रवक्ता अर्यालले जानकारी दिनुभयो ।
