महालक्ष्मी उपाध्याय ‘डीना’

हेटौंडाः नेपाली कांग्रेसको १४ औं महाधिवेशनबाट मकवानपुरकी नेतृ महालक्ष्मी उपाध्याय ‘डीना’ विजयी हुनुभएको छ ।

महिला कोटाको सहमहामन्त्रीमा डीनाले शेरबहादुर प्यानलबाट विजयी हुँदा कमला पन्तलाई पराजित गर्नुभएको हो । बिहीबार साँझ सकिएको मतगणनाअनुसार डीनाले २ हजार ५ सय ३३ मत प्राप्त गर्नुभयो । उहाँसँग प्रतिस्पर्धी रहनुभएकी पन्तले २ हजार १ सय ५ मत प्राप्त गर्नुभयो ।

नेपाली कांग्रेसको १४ औं महाधिवेशनबाट सभापतिमा शेरबहादुर देउवा, उपसभापतिमा पूर्णबहादुर खड्का र धनराज गुरुङ, महामन्त्रीमा गगनकुमार थापा र विश्वप्रकाश शर्मा विजयी हुनुभएको छ । पदाधिकारीपछि सदस्यको मतगणना हुने बताइएको छ ।