हेटौंडाः बकैया गाउँपालिकाको हात्तीसुँडेमा रहेको बुद्ध माध्यमिक विद्यालयकी छात्रा सुमिना दाहाल मुक्तक प्रतियोगितामा उत्कृष्ट हुनुभएको छ । माध्यमिक विद्यालयस्तीय (कक्षा ८–१२) का विद्यार्थीबीच भएको प्रतियोगितामा दाहाल उत्कृष्ट हुनुभएको हो । झरना साहित्यिक परिवार मकवानपुरले आयोजना गरेको प्रतियोगितामा दाहाल उत्कृष्ट भई पुरस्कृत हुनुभएको छ । दाहाललाई शिवसवित्री अधिकारी स्मृति नवप्रतिभा सम्मानस्वरुप नगद ५ हजार ५ सय ५५ रुपैयाँ राशिसहित पुरस्कृत गरिएको छ ।
झरना साहित्यिक परिवार मकवानपुरको २८८ औं साहित्य शृंखलाको अवसरमा शनिबार काठमाडौं निवासी मुक्तककार रुद्र अधिकारीलाई शिवसावित्री अधिकारी मुक्तक सम्मान–२०७९ बाट सम्मान गरिएको छ । नगद १५ हजार रुपैयाँसहित अधिकारीलाई सम्मान गरिएको हो । उहाँका ५ वटा मुक्तक संग्रह प्रकाशित छन् । साहित्य शृंखलाकै अवसरमा २९ औं मुक्तक साँझ–२०७९ आयोजना गरिएको छ । २१ जना प्रतियोगीहरुले मुक्तक प्रतियोगितामा सहभागी जनाएका थिए । जसमा उत्कृष्ट ११ प्रतियोगीहरुलाई मुक्तक वाचन गर्न दिइएको हो ।
निर्णायकको भूमिका मुक्तकार सानु खनाल र विश्व राईले निर्वाह गर्नुभएको थियो । झरना साहित्यिक परिवार मकवानपुरका अध्यक्ष विश्वनाथ सञ्जेलको सभाध्यक्ष तथा प्राध्यापक निर्मोही व्यासको प्रमुख आतिथ्यमा कार्यक्रम भएको हो । झरनाका उपाध्यक्ष चिरञ्जीवी लामिछानेले स्वागत मन्तव्य राख्नुभयो ।
