हेटौंडाः मकवानपुर क्रिकेट टिम बारा जिल्लाको कलैयामा शनिबार सम्पन्न कलैया टी–२० मेयर कपको फाइनलमा पराजित भएको छ । शनिबार भएको फाइनल खेलमा मकवानपुर पर्साको वीरगंज क्रिकेट टिमसँग २३ रनले पराजित भएको हो ।
उपाधि विजेता वीरगंजले ६० हजार रुपैयाँसहित शिल्ड, मेडल तथा प्रमाणपत्र प्राप्त गरेको छ भने उपविजेता बनेको मकवानपुरले ३० हजार रुपैयाँ चित्त बुझाएको छ । टस जितेर पहिले व्याटिङ गरेको वीरगंजले २० ओभरको खेलमा ९ विकेट गमाएर १ सय ४१ रन बनायो । वीरगंजका सुरज पटेलले ४८ बलमा ४९ रन बनाए । खेलको म्यान अफ द म्याच पटेल घोषित भए ।
जवाफी व्याटिङमा उत्रिएको मकवानपुरले १९.४ ओभरमा १० विकेट गुमाउँदै १ सय १८ रन मात्र बनायो । मकवानपुरका लागि सूवर्ण भट्टले २२ बलमा २८ रन, सक्षम बास्ताकोटीले १६ बलमा २५ र गौरव खड्काले ३० बलमा २२ रन बनाए । मकवानपुरका रिजन ढकाल र समीर चौलागाईले समान २–२ विकेट तथा विशाल फुयाँलले १ विकेट लिए ।
