हेटौंडाः मकवानपुरको पूर्वी क्षेत्रमा पर्ने बागमती गाउँपालिकामा खुला नकआउट फुटबल प्रतियोगिता हुने भएको छ । बागमती–५, ज्यामिरेमा रहेको ग्रामीण बहुउद्देश्यीय समाज नेपालले आगामी फागुन २० गतेदेखि प्रतियोगिता आयोजना गर्न लागेको हो । स्थानीयस्तरमा रहेका खेलाडीहरुको प्रतिभा प्रस्फुटन गराउनुका साथै आन्तरिक खेलकुदको विकासमा सहयोग पुर्याउने उद्देश्यले फुटबल प्रतियोगिता आयोजना गरिएको कार्यक्रम संयोजक खड्ग पुलामीले जानकारी दिनुभयो ।
प्रतियोगिताको विजेता टिमले १ लाख र उपविजेताले ५० हजार नगदसहित शिल्ड, मेडल र प्रमाणपत्र हात पार्नेछन् । प्रतियोगितामा उत्कृष्ट गोलकिपर, स्ट्राईकर, प्लेयर अफ द टुर्नामेण्ट र म्यान अफ द म्याच हुने खेलाडीहरुलाई पनि पुरस्कार प्रदान गरिने आयोजकले जनाएको छ । २०५३ सालमा स्थापित संस्थाले खेलकुदसँगै अन्य सामाजिक उत्तरदायित्व वहन गर्दै आएता पनि केहि समय निस्क्रिय रहेको थियो । आगामी दिनमा संस्थाले विभिन्न समयमा सामाजिक कामसँगै खेलकुद गतिविधिसमेत गर्दै जाने संस्थाका सचिव केदार थापाले जानकारी दिनुभयो ।
