हेटौँडा : हेटौँडा–२ स्थित मकवानपुर बहुमुखी क्याम्पसले शैक्षिक भवन निर्माणका लागि संघीय सरकारसँग २५ करोड रुपैयाँ बराबरको योजना पेश गरेको छ । बिहीबार क्याम्पस सञ्चालक समितिका निवर्तमान अध्यक्ष एवम् बागमती प्रदेशका प्रथम मुख्यमन्त्री डोरमणि पौडेलको नेतृत्वमा क्याम्पस सञ्चालक समितिका अध्यक्ष अनन्तप्रसाद पौडेल, क्याम्पस प्रमुख डा. यमबहादुर सिलवालसहित क्याम्पस सञ्चालक समितिका पदाधिकारीले शिक्षा, विज्ञान तथा प्रविधि मन्त्री विद्या भट्टराई र कार्यवाहक प्रधानमन्त्री एवम् सहरी विकास मन्त्री प्रकाशमान सिंहलाई भेटेर योजना प्रस्तुत गरेको छ ।
संघीय सरकारसमक्ष मकवानपुर बहुमुखी क्याम्पसको योजना पेश गर्नका लागि सरकारका सचेतक एवम् मकवानपुरबाटै निर्वाचित प्रतिनिधि सभा सदस्य महेश कुमार बर्तौलाले सहजीकरण गर्नुभएको थियो । क्याम्पस प्रशासनका अनुसार हाल विद्यार्थी संख्याको वृद्धिसँगै आधुनिक पूर्वाधारको आवश्यकता बढिरहेकाले संघीय सरकारलाई योजना प्रस्ताव गरेको हो । क्याम्पस प्रमुख डा. यम बहादुर सिलवालका अनुसार मकवानपुर तथा छिमेकी जिल्लाका विद्यार्थीलाई गुणस्तरीय शिक्षा प्रदान गर्दै आएको यस क्याम्पसमा हाल उपलब्ध भवन तथा संरचना अपुग भएको छ । विशेषगरी, स्वायत्त शैक्षिक कार्यक्रमहरू सञ्चालन गर्न आवश्यक भौतिक पूर्वाधारको अभाव रहेको क्याम्पस प्रमुख डा. सिलवालको भनाइ छ ।
नेपालकै एक प्रमुख सामुदायिक क्याम्पसका रूपमा परिचित मकवानपुर बहुमुखी क्याम्पसले विश्वविद्यालय अनुदान आयोगबाट गुणस्तर सुनिश्चितताको प्रमाणपत्र मान्यता प्राप्त गरिसकेको छ । ग्रामीण तथा विपन्न समुदायका विद्यार्थीहरूका लागि उच्च शिक्षाको प्रमुख केन्द्रका रूपमा रहेको यस क्याम्पसमा पर्याप्त कक्षाकोठाको अभाव, जीर्ण भवनहरू र आधुनिक शिक्षण प्रविधि अभावका कारण अध्ययन–अध्यापनमा चुनौती उत्पन्न भएको क्याम्पस प्रशासनले जनाएको छ ।
क्याम्पस प्रशासनले रोजगारमुखी, उद्यमशिलता तथा प्राविधिक शिक्षाका विभिन्न कार्यक्रमहरू सञ्चालन गर्दै स्वदेशमै रोजगारी सिर्जना गर्ने लक्ष्य राखेको क्याम्पस प्रमुख सिलवालको भनाइ छ । उक्त योजनालाई प्रभावकारी रूपमा कार्यान्वयन गर्न नयाँ भवन आवश्यक भएकोले शिक्षा, विज्ञान तथा प्रविधि मन्त्रालय तथा सहरी विकास मन्त्रालयमार्फत २५ करोड रुपैयाँको बजेट माग गरिएको क्याम्पस प्रमुख डा. सिलवालले जानकारी दिनुभयो । यस परियोजनाले मकवानपुर बहुमुखी क्याम्पसलाई मात्र नभई नेपाल सरकारको उच्च शिक्षा पूर्वाधार सुदृढीकरण तथा सहरी पूर्वाधार विकास अभियानलाई समेत टेवा पुग्ने विश्वास क्याम्पस प्रशासनले लिएको छ । आगामी आ.व. २०८२/८३ को बजेट कार्यक्रममा यस योजनालाई समावेश गर्न सम्बन्धित निकायसँग आग्रह गरिएको छ ।
