हेटौंडा : बकैया–५, पावसस्थित गीतावर आधारभूत विद्यालयमा ५ कोठे छात्रावास भवन निर्माणको कार्य अन्तिम चरणमा पुगेको छ । पालिकाकै एकमात्र छात्रावास भएको विद्यालय गीतावर आधारभूत विद्यालयको छात्रावास भवन ३९ लाख रुपैयाँ लागतमा निर्माण भइरहेको छ । ग्रामीण असहाय बालबालिका सामुदायिक पुनःस्थापना केन्द्र मकवानपुरको ३० लाख रुपैयाँ आर्थिक सहयोग र नपुग रकम स्थानीय श्रोत परिचालन गर्ने गरी बकैया गाउँपालिका कार्यालय र विद्यालय बीच त्रिपक्षीय सम्झौतामा भएको विद्यालय प्रधानाध्यापक हरिहर खनालले जानकारी दिनुभयो ।
भवन निर्माण कार्यको गाउँपालिकाको प्राविधिक टोलीले अनुगमन गरिसकेको छ भने संस्थाको प्राविधिक टोलीले अनुगमन गर्न बाँकी रहेको प्रधानाध्यापक खनालले जानकारी दिनुभयो । विद्यालयले ९ वर्षदेखि छात्रावास सञ्चालन गर्दै आएको छ । हिँडेर आउन ४ घण्टा लाग्ने बकैया–६, ज्यामिरे, बकैया–२, चाँदेशीर र बकैया–१, धिँयालका विद्यार्थी छात्रावासमा बसेर पढिरहेका छन् । नर्सरीदेखि ८ कक्षासम्मका विद्यार्थी छात्रावासमा बसेर पढ्ने गरेको प्रधानाध्यापक खनाल बताउनुहुन्छ ।
माथिल्लो कक्षामा अध्ययन गर्ने दाइ–दिदीसँग बसेर साना विद्यार्थी पनि विद्यालयमा पढिरहेको प्रधानाध्यापक खनालको भनाइ छ । एकै घरका ४ जनासम्म विद्यार्थी छात्रावासमा बसेर पढिरहेका छन् । ५ कोठे नयाँ भवन बनेपछि पुरानो छात्रावास भवन पनि मर्मत गरेर ७० देखि ७५ जना विद्यार्थीलाई छात्रावासको सुविधा उपलब्ध गराउने प्रधानाध्यापक खनालले जानकारी दिनुभयो । प्राविधिक टोलीको मुल्याङ्कनबाट पास भएपछि चैत महिनाभित्र छात्रावास भवन विद्यालयलाई हस्तान्तरण गर्नेछ ।
बकैया गाउँपालिकाले गत फागुनबाट एक होस्टल वार्डेनको व्यवस्था गरेको छ । पालिकाले चालु आर्थिक वर्ष २०८१/०८२ देखि दाल, चामल र तेलको व्यवस्था गरेको छ । यसअघि भने विद्यार्थी आफैले व्यवस्थापन गर्नुपर्ने थियो । व्यवस्थित छात्रावासको निर्माण भएसँगै छात्रावासमा बस्ने विद्यार्थीको संख्या बढ्ने प्रधानाध्यापक हरिहर खनालले जानकारी दिनुभयो । गीतावर आविमा शिशु कक्षादेखि ८ कक्षासम्म पढाई हुन्छ । हाल विद्यालयमा २४९ जना विद्यार्थी अध्ययनरत छन् भने ९ जना शिक्षक रहेका छन् ।
