हेटौँडा : लागूऔषध खैरो हेरोईन र ओनेरेक्स कारोबार गरिरहेको अवस्थामा ३ जनालाई मकवानपुर प्रहरीले हेटौँडा–४, नेपालचोकबाट पक्राउ गरेको छ । जिल्ला प्रहरी कार्यालय मकवानपुरका प्रवक्ता प्रहरी नायव उपरीक्षक श्यामु अर्यालका अनुसार बिहीबार राती १० बजेर २० मिनेटको समयमा प्रहरीले उनीहरुलाई पक्राउ गरेको हो ।
प्रहरीले हेटौँडा–७ घर भई हेटौँडा–४ नेपालचोकमा डेरा गरी बस्ने ३४ वर्षीय दिनेश गोले, हेटौंडा–१० का २८ वर्षीय निरोज लामा र ३३ वर्षीय महम्मद मियाँलाई पक्राउ गरिएको जनाएको छ । लागूऔषध कारोबार भइरहेको भन्ने विशेष सूचनाको आधारमा उनीहरुलाई पक्राउ गरिएको प्रवक्ता अर्यालले जानकारी दिनुभयो । उनीहरुको साथबाट २ ग्राम ५० मिलिग्राम खेरो हेरोईन र ११ बोतल लागूऔषध अनरेक्स बरामद भएको प्रवक्ता अर्यालले जानकारी दिनुभयो । पक्राउ परेका उनीहरुलाई लागुऔषध मुद्दामा ७ दिनको म्याद थप गरी थप अनुसन्धान कार्य अघि बढाइएको प्रहरीको भनाई छ ।
