हेटौंडाः विद्यालय तहका बालबालिकालाई लक्षित गरेर मकवानपुर जिल्ला साइक्लिङ संघले साइक्लिङ र स्विमिङ तालिमको आयोजना गरेको छ । आज शुक्रबारदेखि सुरु भएको तालिममा २३ जना बालबालिका सहभागी भएका छन् । ८ वर्षदेखि १५ वर्ष उमेर समूहका ५ जना बालिका र १९ जना बालक सहभागी छन् ।
जीवनोपयोगी सीप, शारीरिक एवम् मानसिक विकासमा सहयोगी क्रियाकलाप हुनुका साथै विद्यालयको वार्षिक परीक्षा सकिएको अवसरमा तीनदिने तालिमको आयोजना गरिएको मकवानपुर जिल्ला साइक्लिङ संघका अध्यक्ष संगीत श्रेष्ठले जानकारी दिनुभएको छ । बिहान साढे ७ बजेदेखि साँझ साढे ४ बजेसम्म सञ्चालन हुने तालिममा बिहानको खाजा, खाना, दिउँसोको खाजाको समेत व्यवस्था गरिएको उहाँले जानकारी दिनुभयो ।
साइक्लिङ र स्विमिङको तालिममा प्रशिक्षकको रुपमा संगीत श्रेष्ठ, राजीव खड्गी, लक्ष्मी मगर, चनद्र थापा र प्रमित मगर सहभागी हुनुहुन्छ । तालिम पर्सी आइतबारसम्म सञ्चालन हुनेछ ।
