हेटौँडा : हेटौँडा–५, पिप्लेस्थित ज्ञानोदय बालबाटिका आवासीय विद्यालयले प्राथमिक तथा पूर्वप्राथमिक तहका शिक्षकका लागि एकीकृत पाठ्यक्रम र बाल मनोविज्ञानमा आधारित शिक्षण विधि बारे तीन दिने तालिम आयोजना गरेको छ । बिहीबारबाट सुरु भएको तालिम शनिबारसम्म सञ्चालन हुनेछ । चालु शैक्षिकसत्रको वार्षिक परीक्षा सकिएर पठनपाठन नभएको समयमा ६ वटा विद्यालयका शिक्षकको सहभागितामा तालिम भइरहेको छ ।
तालिममा ज्ञानोदय बालबाटिकासँगै हेटौँडा–६ स्थित प्रज्वल शिक्षा सदन, हेटौँडा–३ स्थित शिक्षा विकास शिशु सदन, हेटौँडा–११ स्थित जेम्स स्कूल, हेटौँडा–१८ स्थित मकवानपुर बालविद्या सदन र लोटस एकेडेमीका शिक्षकहरुको सहभागिता रहेको छ । ज्ञानोदय बालबाटिका आवासीय विद्यालयका सञ्चालक श्यामकुमार बानियाँका अनुसार तालिममा ५३ जना शिक्षक सहभागी हुनुहुन्छ ।
