हेटौँडा : चितवन राष्ट्रिय निकुञ्जअन्तर्गत चितवन जिल्लाको माडी नगरपालिका–१ मा गैंडाको आक्रमणबाट नेपाली सेनाको एक जना सिपाही घाइते भएका छन् । बुधबार दिउँसो साढे १२ बजेको समयमा निकुञ्ज भित्र ध्रुव पोष्टबाट नजिकै सडकबाट ५० मिटर भित्र जंगलमा नयाँ गोरख गण कसरामा कार्यरत पर्सा जिल्लाको विरगन्ज महानगरपालिका–३१ का २० वर्षीय सिपाही अभिमन्यु खाँ चौधरी गैंडाको आक्रमणबाट घाइते भएका हुन् ।
गस्ती जाने क्रममा बच्चासहितको गैंडाले आक्रमण गर्दा चौधरी घाइते भएको बागमती प्रदेश प्रहरी कार्यालय हेटौँडाले जानकारी दिएको छ । चौधरीलाई उपचारका लागि भरतपुर अस्पतालमा लगिएको छ । चौधरीको बाँया खुट्टा, हात, अनुहार, छातिमा भित्री चोट लागेको छ । चौधरीको अवस्था मध्यम रहेको र उपचार भइरहेको प्रहरीले जानकारी दिएको छ ।
