हेटौंडा: नेपाल प्रेस युनियन मकवानपुरले ४ जनालाई सम्मान तथा पुरस्कार प्रदान गरेको छ । शनिबार सम्पन्न वार्षिक साधारणसभा तथा वनभोज कार्यक्रममा ४ जना पत्रकारलाई सम्मान गरिएको हो ।
नगद पुरस्कारसहित सम्मानित हुनेमा संस्थापक अध्यक्ष राममणि दाहाल, प्रेस युनियनका बागमती प्रदेश सदस्य गंगाप्रसाद पौडेल, गणेश दर्पण अधिकारी र मानवी बानियाँ छन् । दाहाललाई स्वर्गीय सीतादेवी स्मृति प्रेस युनियन पत्रकारिता पुरस्कार–२०८१ बाट नगद १५ हजार रुपैयाँसहित सम्मान गरिएको हो ।
यस्तै, प्रेस युनियन पत्रकारिता पुरस्कार–२०८१ बाट पौडेल, अधिकारी र बानियाँलाई १०/१० हजार रुपैयाँ नगदसहित सम्मान गरिएको छ । नेपाल प्रेस युनियन मकवानपुरका अध्यक्ष सुबास बिडारीको अध्यक्षता तथा नेपाल प्रेस युनियनका केन्द्रीय अध्यक्ष शिव लम्सालको प्रमुख आतिथ्यमा कार्यक्रम भएको हो ।
कार्यक्रममा नेपाली कांग्रेस मकवानपुरका सभापति बुद्ध लामा ब्लोन, नेपाल पत्रकार महासंघका वरिष्ठ उपाध्यक्ष दीपक आचार्य, प्रेस युनियनका उपाध्यक्ष नकुल अर्याल, महासचिव दीलिप पौडेल, केन्द्रीय सदस्य राजन दाहाल खुसराज, सविना पौडेललगायतको उपस्थिति रहेको थियो । युनियनले नेपाल पत्रकार महासंघ मकवानपुर शाखाको नवनिर्वाचित कार्यसमितिलाई बधाई ज्ञापन गर्दै अध्यक्ष बालकृष्ण अधिकारीलाई प्रमाणपत्रसमेत प्रदान गरेको थियो ।
