हेटौंडाः अखिल नेपाल फुटबल संघ (एन्फा) को आयोजनामा एन्फा अन्तर कलेजस्तरीय फुटसल च्याम्पियनसीप प्रतियोगिता हुने भएको छ । बुधबार एन्फाका प्रवक्ता सुरेश साहले एक सूचना जारी गर्दै प्रतियोगिताबारे जानकारी दिनुभएको हो ।
बैशाख २२ गतेदेखि जेठ ५ गतेसम्म हुने प्रतियोगिता लगनखेलस्थित नेपाली सेनाको शारीरिक प्रशिक्षण केन्द्रको कभर्डहलमा सञ्चालन हुने जनाइएको छ । प्रतियोगितामा सहभागी हुने कलेजहरुलाई आठवटा समूहमा विभाजन गरेर लिगकम नकआउट प्रणालीमा खेल सञ्चालन गरिने जनाइएको छ ।
प्रतियोगिताको उपाधि विजेता टिमले ५ लाख रुपैयाँ र उपविजेता टिमले ३ लाख रुपैयाँसहित शिल्ड, मेडल तथा प्रमाणपत्र प्राप्त गर्नेछन् । यस्तै, प्रतियोगिताको अनुशासित खेलाडीलाई ५० हजार रुपैयाँ तथा अन्य विधागत उत्कृष्ट खेलाडीहरुलाई २५–२५ हजार रुपैयाँ प्रदान गरिनेछ । प्रतियोगिता आयोजनाका लागि ३० लाख रुपैयाँ खर्च हुने अनुमान गरेको एन्फाले जनाएको छ । प्रतियोगितामा सहभागी हुन २० हजार रुपैयाँ दर्ता शुल्क लाग्नेछ । प्रतियोगितामा ब्याच्लर र प्लस टुमा अध्ययन गर्ने विद्यार्थीहरुको सहभागिता रहने जनाइएको छ ।
