हेटौंडाः हेटौंडा–२ स्थित मकवानपुर बहुमुखी क्याम्पसको ४४ औं स्थापना दिवसको अवसरमा स्वतन्त्र विद्यार्थी युनियन (स्ववियु) ले आयोजना गरिरहेको खेलकुद कार्यक्रमअन्तर्गत् भलिबल प्रतियोगिता सम्पन्न भएको छ । प्रतियोगिताका संयोजक बुद्ध बरामका अनुसार सोमबार र मंगलबार दुई दिन सञ्चालन गरी भलिबल खेल सम्पन्न भएको हो ।
भलिबल खेलमा महिलातर्फको उपाधि बीबीएस तेस्रो वर्षले जितेको छ । फाइनल खेलमा बीबीएम पहिलो वर्षलाई २–१ को सेटले हराउँदै बीबीएस तेस्रो वर्षले उपाधि जितेको हो । प्रतियोगितामा महिलातर्फ ८ टिमको सहभागिता रहेको थियो ।
यस्तै, पुरुषतर्फको उपाधि टिम फौजीले जितेको छ । फाइनलमा बीबीएस तेस्रो वर्ष नेपाली माध्यमलाई २–१ को सेटले हराउँदै फौजीले उपाधि जितेको हो । प्रतियोगितामा पुरुषतर्फ २४ टिमको सहभागिता रहेको थियो ।
विजयी टिमलाई वार्षिकोत्सव समापन कार्यक्रममा पुरस्कार वितरण गरिने संयोजक बरामले बताउनुभयो । स्ववियुले गएको आइतबारबाट विभिन्न खेलकुदका कार्यक्रमहरु सञ्चालन गर्दै आइरहेको छ । कार्यक्रम फागुन ५ गतेसम्म चल्ने संयोजक बरामले बताउनुभयो ।
