हेटौंडाः मकवानपुरगढी गाउँपालिका–३, मक्रान्चुलीस्थित भानु माध्यमिक विद्यालयबाट यस वर्ष ४७ जना विद्यार्थीले एसईई दिने भएका छन् । विद्यालयबाट नियमिततर्फ ४७ जना विद्यार्थीले २०८० को माध्यमिक शिक्षा परीक्षा (एसईई) दिने भएका हुन् ।
ग्रेडवृद्धितर्फ यस वर्ष एक जना पनि विद्यार्थी नरहेको विद्यालयका शिक्षक शान्तप्रसाद दहालले जानकारी दिनुभयो । गत वर्षको एसईई परीक्षामा १०० प्रतिशत उत्तीर्ण भएका थिए भने यो वर्ष सबै विद्यार्थीहरुलाई उत्तीर्ण गराउने विद्यालयको उद्देश्य रहेको छ ।
पहिलो त्रैमासिक परीक्षाको तुलनामा दोस्रो त्रैमासिक परीक्षाको नतिजामा सुधार आएको शिक्षक दहालको भनाइ छ । एसईईका लागि विद्यार्थीहरुले तयारी गरिरहेको उहाँले बताउनुभयो । एसईई दिने विद्यार्थीका लागि गत भदौबाट नै अतिरिक्त कक्षा सञ्चालन भइरहेको उहाँले जानकारी दिनुभयो । कक्षा १२ सम्म पठनपाठन हुने विद्यालयमा हाल ५ सय २५ जना विद्यार्थी अध्ययनरत रहेका छन् ।
