हेटौँडाः हेटौँडा–४, भैरवरोडस्थित किताबघरले शुक्रबारदेखि विद्यालयमा पुस्तक प्रदर्शनी यात्रा–२०८० को सुरुवात गरेको छ । विद्यार्थीमा पठन संस्कृतिको विकास गर्ने उद्देश्यले विविध विषयका पुस्तक प्रदर्शनीको सुरुवात हेटौँडा–५ स्थित सिद्धार्थ शिशु सदनबाट गरेको छ । विद्यार्थीलाई कक्षागतरुपमा पुस्तक प्रदर्शनीमा सहभागी गराइएको थियो ।
विद्यार्थीले प्रदर्शनीमा पुस्तकको अवलोकन गर्नुका साथै रुचिका पुस्तक खरिद समेत गरेका थिए । किताबघरका सञ्चालक छवि अनित्यले बिहिबार सिद्धार्थ शिशु सदनमा कक्षा ७, ८ र ९ का विद्यार्थीलाई पठन संस्कृतिको विषयमा अभिमुखीकरण समेत गराउनुभएको थियो । पुस्तक प्रदर्शनीको अवसरमा २ सय वटा पुस्तक विक्री भएको अनित्यले जानकारी दिनुभएको छ । विद्यालयसँग समन्वय गरेर प्रदर्शनी आयोजना गरिएको र विद्यालय प्रशासनबाट साथ र सहयोग प्राप्त भएको अनित्य बताउनुहुन्छ ।
यही मंसिर २२ गते हेटौँडा–५ स्थित ज्ञानोदय बालबाटिका एकेडेमी र मंसिर २४ गते हेटौँडा–४ स्थित ब्रह्मदिक एकेडेमीमा पुस्तक प्रदर्शनीको आयोजना गरिँदैछ । अन्य विद्यालयसँग पनि समन्वय भइरहेको र यात्रा निरन्तर जारी रहने उहाँको भनाइ छ । किताबघरले पूर्वप्राथमिक तहदेखि मावि तहसम्मका विद्यार्थीका लागि उपयुक्त स्वदेशी तथा विदेशी प्रकाशन गृहका पुस्तक विक्री गर्दै आएको छ ।
प्रदर्शनीमा विद्यार्थीको उत्सुकता राम्रो रहेको उल्लेख गर्नुहुँदै छवि भन्नुहुन्छ, “केही विद्यार्थीले प्रदर्शनीमा राखिएका पुस्तकमध्ये राम्रा पुस्तक छानेर लिनुहुन्छ । कतिपय विद्यार्थीलाई उपयुक्त पुस्तक छनोट गरेर यो पुस्तक पुढ्नुस् भनेर दिनु पनि पर्छ । कतिपय विद्यार्थी भने निश्चित प्रकाशनगृहका पुस्तक नै खोजी गर्नुहुन्छ ।” किताबघरले दसैंको विदालाई लक्षित गरेर असोज महिनामा पनि हेटौँडा नगरका ९ वटा विद्यालयमा पुस्तक प्रदर्शनीको आयोजना गरेको थियो । पुस्तक प्रदर्शनी अधिकांश निजी विद्यालयमा आयोजना गरिएको थियो ।
सिद्धार्थ शिशु सदनमा कक्षा ७ मा अध्ययनरत रिभानी थापा पाठ्यक्रमभन्दा बाहिरको पहिलो पटक पुस्तक खरिद गर्न पाएकोमा खुसी देखिनुहुन्थ्यो । बिहिबार पठन संस्कृतिका विषयमा आयोजित अभिमुखीकरणमा सहभागी भएकी रिभानीले पुस्तक प्रदर्शनीका बेला पुस्तक खरिद गर्न अभिभावकसँग पैसा मागेर लिएर आउनुभएको थियो । पुस्तक प्रदर्शनीमा पुस्तक खरिद गर्ने प्रस्तावलाई अभिभावकले पनि सहर्ष स्वीकार गरेर पैसा दिनुभएको रिभानी बताउनुहुन्छ ।
