हेटौँडाः मकवानपुरका हास्यव्यंग्यकार आरसी रिजाल गणेश कुमार पौडेल स्मृति सम्मान–२०८० बाट सम्मानित हुनुभएको छ । शनिबार सिस्नुपानी नेपाल मकवानपुरले एक समारोहका बीच रिजाललाई सम्मान गरेको हो । रिजाललाई नगद २५ हजार १ रुपैयाँसहित दोसल्ला ओढाएर सम्मानपत्र प्रदान गरिएको छ ।
हास्यव्यंग्यकार रिजालले आफूले सम्मानस्वरुप प्राप्त रकममा त्यत्तिनै थप गरेर कुल ५० हजार रुपैयाँ सिस्नुपानी नेपाल मकवानपुरलाई फिर्ता गर्नुभएको छ । रिजालले सिस्नुपानी नेपाल मकवानपुरकी कोषाध्यक्ष शुभद्रा हुमागाईलाई ५० हजार रुपैयाँ हस्तान्तरण गर्नुभयो । रिजालले उक्त रकममा एक वर्षभित्र थप ५० हजार उपलब्ध गराई एक लाख रुपैयाँको कोष बनाइदिने प्रतिवद्धता पनि व्यक्त गर्नुभएको छ । उहाँले नवसर्जकलाई प्रोत्साहित गर्ने गरी पुरस्कार स्थापना गर्न अक्षयकोषको रुपमा स्थापना गर्न सिस्नुपानी नेपाल मकवानपुरलाई आग्रह समेत गर्नुभएको छ ।
यस्तै सिस्नुपानी नेपाल मकवानपुरले स्वर्गीय गणेश कुमार पौडलको स्मृति ग्रन्थ पनि लोकार्पण गरेको छ । स्वर्गीय पौडेलका समकक्षी, साहित्यकारले उहाँसँगको सामिप्यता, उहाँको व्यक्तित्व र योगदानका सन्दर्भमा लेख, रचना प्रकाशित गरिएको छ । सिस्नुपानी मकवानपुरले साहित्यिक गतिविधिका फोटा र दृश्य खिचेर सहयोग गर्ने महेन्द्र ओझालाई प्रसंशापत्र प्रदान गरेको छ । सिस्नुपानी नेपाल मकवानपुरका अध्यक्ष राजकुमार लामिछानेको सभाध्यक्ष तथा वरिष्ठ हास्यव्यंग्यकार नरनाथ लुइँटेलको प्रमुख आतिथ्यमा कार्यक्रम भएको हो ।
भीम विराग संगीत, साहित्य, कला प्रतिष्ठानका अध्यक्ष हयग्रीव आचार्यले पहिलोपटक स्मृतिमा ग्रन्थ निर्माण गर्नु स्वागतयोग्य कार्य रहेको बताउनुभयो । स्वर्गीय पौडलका मित्र समेत रहनुभएका रामचन्द्र आचार्य फुर्सतीले बाल्यकाल सम्झाउनु हुँदै पौडेलको व्यक्तित्वबारे जानकारी दिनुभयो । कार्यक्रममा साहित्यकारहरुले रचना वाचन गरेका थिए । स्वर्गीय पौडेलका छोरा गौरव पौडेलले बुबाप्रति साहित्य र सामाजिक क्षेत्रबाट प्रस्तुत भएको माया र सद्भावप्रति आभार व्यक्त गर्नुभयो । “बुबाले त्यत्ति ठूलो काम गर्नुभयो जस्तो नलागे पनि साहित्य र सामाजिक क्षेत्रबाट उहाँप्रति देखाउनु भएको सम्मानले हामी आभारी छौं”, गौरवले भन्नुभयो ।
