मकवानपुर जिल्लाको क्रिकेट टिमले चितवन जिल्लाको क्रिकेट टिमसँग हेटौंडाको हुप्रचौरमा तीन एकदिवसीय मैत्रीपूर्ण क्रिकेट खेल खेल्यो । सोमबार, मंगलबार र बुधबार भएको तीन एकदिवसीय मैत्रीपूर्ण खेलमध्ये चितवनले पहिलो २ खेलमा जित दर्ता गरेपछि मकवानपुरले अन्तिम खेलमा सान्त्वना जीत दर्ता ग¥यो । मैत्रीपूर्ण खेलमा घरेलु मैदानमै २–१ ले पछि परेको मकवानपुरे टिमका कप्तान सुमन सुनारसँग समृद्ध समाज दैनिकका संवाददाता कमल बिकले गर्नुभएको कुराकानीः
चितवन जिल्लासँगको तीन एकदिवसीय मैत्रीपूर्ण क्रिकेट खेल कस्तो रह्यो ?
सुनारः यो खेल खासगरी जुनियर खेलाडीका लागि मौका दिनका लागि गरिएको हो । सिनियर खेलाडीहरुलाई आराम गराएर जुनियर खेलाडीलाई मौका दिएको हो । जुनियर खेलाडीहरुले केही अनुभव पाएको महसुस भएको छ ।
यो श्रृंखला खेल्दै गर्दा मकवानपुरको टिमको सवल र कमजोर पक्षहरु केके पाउनुभयो ?
सुनारः चितवन टिमसँग हामी निरन्तर खेल्दै आएका छौँ । चितवन टिम हामीसँग खेल्न एकदम रुचाउँछ भने हामी पनि चितवनसँग खेल्न रुचाउछौँ । हामीबीच राम्रो मित्रता छ । खेलमा सवल र कमजोर सबैको पक्ष हुन्छ । कहिलेकाहीँ हाम्रो टिमले राम्रो खेल्छ भने कहिलेकाहीँ चितवनले राम्रो खेल्छ । जसले राम्रो खेल्छ उसले जित्ने हो । यो श्रृङ्खलाको कुरा गर्ने हो भने हामीले जुनियरहरुलाई मौका दिएको हुनाले खेलमा हामी कमजोर सावित भएको जस्तो लागेको छ ।
नयाँ खेलाडीहरु जिल्लाको टिममा रहेर खेल्ने कति छन् ? उनिहरुले कस्तो खेले ?
सुनारः अहिलेको श्रृङ्खलाको कुरा गर्ने हो भने हामीले ९ जना नयाँ खेलाडीलाई खेलाएका थियौँ । हामीले यस्तै खेलहरुमा मौका दिँदै गयौँ भने उनीहरुले पछिको खेलहरुमा राम्रो खेल्छन् जस्तो लाग्छ । उनीहरुसँग अनुभवको कमिले गर्दा सोचेजस्तो राम्रो खेल्न सकेनन् । जति खेल्यो चित्त बुझ्दो नै थियो ।
तपाईहरुको नियमित क्रिकेटको प्रशिक्षण कस्तो भइरहेकोे छ ?
सुनारः नियमित प्रशिक्षणको अवस्था अहिले नाजुक छ । किनभने हामीसँग अहिले टिम कोच र एकेडेमी केही पनि छैन । सिनियरहरुलाई जति जानेको छ त्यति नै जुनियरहरुलाई सिकाउँदै छन् ।
नयाँ पुस्ताका टिमका तपाईहरुले लागि के–के गर्दै हुनुहुन्छ ?
सुनारः नयाँ पुस्ताका लागि विभिन्न योजनाहरु बनाइरहेका छौँ । उनिहरुलाई कसरी क्रिकेटमा आकर्षित गर्न सकिन्छ भनी लागीपरेका छौँ । छिट्टै एकेडेमीको सुरुवात गर्ने तयारी पनि गर्दैछौँ ।
