जिल्ला सरकारी अस्पतालको रुपमा रहेको हेटौंडा अस्पतालमा चालु आर्थिक वर्षको साढे ९ महिनाको अवधिमै एकलाख सेवाग्राही पुगेका छन् । एक आर्थिक वर्षको अवधिमा एकलाख सेवाग्राही पुगेको यो नै पहिलो पटक हो । हेटौंडा अस्पतालका लागि एक लाख सेवाग्राही पुग्नु उपलब्धीको कुरा हो । बागमती प्रदेश सरकारले प्रदेशको राजधानीमा रहेको अस्पताललाई प्रतिष्ठानको रुपमा विकास गर्ने योजना समेत अगाडि सारेको छ । एक लाख सेवाग्राहीलाई सेवा गर्न सफल अस्पतालका प्रमुख डा. प्रविण श्रेष्ठसँग समृद्ध समाजका सुसन लामिछानेले गर्नुभएको कुराकानीः
प्रमुख, हेटौंडा अस्पताल
समाजः हेटौंडा अस्पतालमा एक आर्थिक वर्षको अवधिमा एक लाख सेवाग्राही पुगेको छ । एक लाखको संख्यामा यो आर्थिक वर्षमा सेवाग्राही पुग्नुको प्रमुख कारण के हुन् ?
श्रेष्ठः एक आर्थिक वर्षको अवधिमा पहिलो पटक हेटौंडा अस्पतालमा सेवाग्राहीको संख्या १ लाख नाघेको छ । हेटौंडा अस्पतालको सेवाहरु गुणस्तरीय हुँदै गएको, स्वास्थ्य बिमा प्रभावकारी हुँदा, कर्मचारी अनुशासित र सेवाहरु विस्तार तथा मुख्य रुपमा जनताले विश्वास गरेका कारण नै सेवाग्राही १ लाख पुगेको हो । हेटौंडा अस्पतालमा अहिले मकवानपुर जिल्लासँगै धनुषा, बारा, पर्सा, सर्लाहिदेखि सेवाग्राहीहरु पनि सेवा लिन आउने गरेका छन् ।
समाजः चालु आर्थिक वर्षमा हेटौंडा अस्पतालले सञ्चालन गरेको नयाँ सेवा के के छन् ?
श्रेष्ठः हेटौंडा अस्पताल सर्वप्रथम कम्प्युटराइज भएको छ । कतिजना बिरामी आए भन्ने तथ्यांकसहित आम्दानीको पनि हिसाब डिजिटलमा देखाउँछ । यस्तै ल्याव रिपोर्ट पनि इमेलमा जान्छ । यो वर्षमा ल्याप्रोसकोपी, इन्डोसकोपी, नाक, कान, घाँटी, छाला तथा दन्त सेवा पनि सुचारु भएका छन् । त्यस्तै डायलासिस सेवाको सबै तयारी भएको छ । लकडाउनपछि डायलासिस सेवा सुरु गर्ने योजना छ । अक्सिजन पाइपलाइन बेडमा पु¥याइएको छ ।
समाजः हेटौंडा अस्पतालमा सबैभन्दा बढी कस्ता सेवाग्राही छन् ?
श्रेष्ठः विगतदेखि नै सामान्य ज्वरो, बच्चा, गाइनो तथा दुर्घटनाका बिरामीहरु बढी आउने गरेका छन् । हेटौंडा अस्पतलामा न्यून आर्थिक अवस्था भएका वर्ग, मध्यम वर्गका मानिसहरुले धेरै सेवा लिने गरेको भएपनि अहिले धनी वर्गका मानिसहरु पनि सेवा लिन आउने गरेका छन् ।
समाजः ओपीडीमा समयमै डाक्टर उपस्थित नभएको, इमर्जेन्सीमा स्वास्थ्यकर्मीबाट राम्रो व्यवहार नभएको, फार्मेसीमा सबैखाले औषधी नपाएको भन्ने गुनसो बढी आइरको छन् । यस्ता समस्या किन दोहोरिरहन्छन् ?
श्रेष्ठः फार्मेसीको कुरा गर्दा सरकारले निशुल्क दिने औषधी उपलब्ध नहुँदा समस्या आउने गर्छ । निशुल्क औषधीको समस्या छ । यसको बारेमा प्रदेश मन्त्रालय, आपूर्ति विभागमा जानकारी पनि गराएको छु । निशुल्क औषधी समयमै उपलब्ध नहुँदा फार्मेसीमा समस्या हुने गरेको हो । त्यस्तै इमर्जेन्सीमा म आफैं पनि भिजिट गर्छु हरेक दिन । एक दुई घटना मात्र त्यस्तो भएको हो । कहिलेकाहि बिरामीको कुरुवाहरुलाई बाहिर बस्नुभन्दा पनि अपजस आउने गरको छ । चिकित्सकहरु १० बजेदेखि ३ बजेसम्म हुन्छन् । उनीहरलाई आकस्मिक कल आएमा उनीहरु जतिबेला पनि हाजिर हुनुपर्छ । उनीहरुको पहिलो प्राथमिकता भर्ना भएको बिरामी हुन् । उनीहरु राउन्डमा गएर आउँदा केही समय ढिलाइ हुनु स्वभाविक हो । यसलाई अझ के गर्न सकिन्छ छलफल गर्नेछु ।
समाजः प्रदेश सरकारले हेटौंडा अस्पताललाई प्रतिष्ठानको रुपमा विकसित गर्ने योजना बनाएको छ । प्रतिष्ठान बनाउने काममा के भइरहेको छ ?
श्रेष्ठः प्रतिष्ठान बनाउन प्रदेश सरकार लागी परेको छ । यसको कामहरु क्रमशः अगाडि बढ्दैछ ।
समाजः हेटौंडा अस्पतालले आगामी दिनमा कस्ता कामलाई प्राथमिकतामा राखेको छ ?
श्रेष्ठः हेटौंडा अस्पतालले मुख्य रुपमा आइसियू, एनआइसियू संचालन गर्ने योजना बनाएको छ । पहिलोपटक अहिले आइसियू सहितको आइसोलेसन वार्ड पनि कर्रामा बनाइएको छ । यस्तै फोहोरमैला व्यवस्थापन गर्न लकडाउनपछि मेसिन आउँदैछ । डिजिटल एक्स–रे मेशिन, अल्ट्र साउन्ड फोर डि ल्याउन टेन्डर भइसकेको अवस्थामा छ । लकडाउनपछि आउँछ भने अस्पतालले आफ्नो जनशक्ति थप गर्ने सँगै आम्दानीको क्षेत्र पनि बढाउने कुरालाई प्राथमिकतामा राखेको छ । अहिले हेटौंडा अस्पताल आर्थिक रुपमा पनि बलियो हुँदै गएको छ ।
