हेटौंडाः नेकपा एकीकृत समाजवादी निकट अखिल नेपाल राष्ट्रिय विद्यार्थी युनियन मकवानपुरको आयोजनामा वक्तृत्वकला प्रतियोगिता भएको छ ।
प्रतियोगितामा मकवानपुर बहुमुखी क्याम्पसमा अध्ययनरत कक्षा–११ की रश्मिता तिमल्सिना प्रथम हुनुभएको छ । सोमबार क्याम्पसको सभाहलमा “सहिदको बलिदान र हाम्रो अभिभारा” भन्ने शिर्षकमा वक्तृत्वकला प्रतियोगिता भएको हो ।
यस्तै प्रतियोगितामा बिबिएस प्रथम वर्षका आदित्य लामा द्वितीय र बिबिएस प्रथम वर्षकै स्वस्तिका बोलखे तृतीय हुनुभएको छ । प्रतियोगितामा प्रथम, द्वितीय र तृतीय हुनेलाई क्रमशः ३ हजार, २ हजार र १ हजार रुपैयाँसहित प्रमाणपत्र प्रदान गरिनेछ । प्रतियोगिताको पुरस्कृत हुनेलाई फागुन २ गते समापन कार्यक्रममा पुरस्कार वितरण गरिने अखिल नेपाल राष्ट्रिय विद्यार्थी युनियन मकवानपुरका सदस्य कुशल पराजुलीले जानकारी दिनुभयो ।
१२ जना विद्यार्थी सहभागी रहेको प्रतियोगितामा रामचन्द्र सुवदी र चिरञ्जीवी लामिछानेले निर्णाकको भूमिका निर्वाह गर्नुभएको थियो । वक्तृत्वकला प्रतियोगिता अनेरास्ववियु मकवानपुर बहुमुखी क्याम्पसका अध्यक्ष विश्वास पराजुलीको सभाध्यक्षता तथा अखिल नेपाल राष्ट्रिय विद्यार्थी युनियन मकवानपुरका अध्यक्ष अरुण खतिवडाको प्रमुख आतिथ्यतामा सम्पन्न भएको थियो ।
