हेटौंडाः र्यापिड डाइग्नोस्टिक किट (आरडीटी) टेस्टमा एन्टीबडी पोजेटिभ देखिएका हेटौंडा उपमहानगरपालिकाका ४ जनाकै प्रयोगशाला परीक्षणमा कोरोना भाइरसको संक्रमण नभएको पाइएको हेटौंडा उपमहानगरपालिकाले जनाएको छ । उपमहानगरपालिकामा पहिलो पटक ४९ जनामा आरडीटी टेस्ट गर्नेक्रममा हिजो बिहिबार ४ जनामा एन्टीबडी पोजेटिभ देखिएको थियो ।
आरडीटी टेस्टमा ५० वर्षीया एक महिलासहित २४, ३२ र ६७ वर्षका ३ जना पुरुषमा एन्टीबडी पोजेटिभ देखिएको थियो । शरीरमा एन्टीबडी पोजेटिभ हुनु भनेको कुनै किसिमको भाइरसविरुद्ध प्रतिरक्षा शक्ति सक्रिय भएको हुन सक्ने अवस्था हो । यसैले कोरोना भाइरसकै कारण एन्डीबडी पोजेटिभ भएको हुन सक्ने आशंकामा प्रयोगशाला परीक्षण गरिने चिकित्सकको भनाइ छ । रगतबाट आरडीटी टेस्ट गरिएका उनीहरुको स्वाब संकलन गरेर हेटौंडास्थित बागमती प्रदेश सरकारले स्थापना गरेको प्रयोगशालामा पीसीआर विधिबाट कोरोना परीक्षण गरिएको थियो । कोरोना संक्रमण नदेखिएसँगै उनीहरु आइसोलेसन कक्षबाट डिसचार्ज भएका छन् ।
चैत १ गतेयता विदेशबाट आएका व्यक्तिमा कोरोना भाइरसको संक्रमण भए नभएको थाहा पाउनका लागि हेटौंडा उपमहानगरपालिकाले आरडीटी टेस्ट सुरु गरेको हो । हेटौंडा उपमहानगरपालिका क्षेत्रभित्र चैत १ गतेयता २ सय २१ जना विदेशबाट आएका व्यक्तिको पहिचान भएको छ ।
