हेटौंडाः राजनीतिक, साहित्य र पत्रकारिता क्षेत्रमा योगदान पुर्याउनुभएका मकवानपुरका श्यामप्रसाद शर्माको स्मृतिमा विभिन्न व्यक्तित्वले लेख्नुभएको रचनाहरुको संगालो ‘स्मृति बिम्बमा श्यामप्रसाद’ पुस्तकको लोकार्पण भएको छ । श्यामप्रसाद शर्मा स्मृति प्रतिष्ठान नेपालले प्रकाशन गरेको पुस्तक बागमती प्रदेश सभाका सभामुख सानुकुमार श्रेष्ठसँगै राजनीतिक एवम् सामाजिक व्यक्तित्वले शनिबार हेटौंडामा लोकार्पण गर्नुभएको हो ।
६६ जना व्यक्तिका रचना संगालोको रुपमा पुस्तक प्रकाशित भएको छ । श्यामप्रसाद शर्मा स्मृति प्रतिष्ठान नेपालका अध्यक्ष कौशल पाण्डेको अध्यक्षतामा भएको पुस्तक लोकार्पण समारोहमा श्यामप्रसाद शर्माको व्यक्तित्वका विषयमा सर्जक सञ्जाल मकवानपुरका अध्यक्ष निमेष निखिलले जानकारी गराउनुभएको थियो । यस्तै प्राध्यापक घनश्याम घिमिरेले पुस्तकको समीक्षात्मक टिप्पणी गर्नुभएको थियो ।
पुस्तक लोकार्पण कार्यक्रममा राजनीतिकर्मी बद्रिप्रसाद खतिवडा, केदार न्यौपाने, बागमती प्रदेश सभा सदस्य प्रेमबहादुर पुलामी, मुनु सिग्देल, ओमबहादुर ग्लानसहित साहित्यकार, राजनीतिकर्मीको उपस्थिति रहेको थियो । बि.सं. १९८६ मा मकवानपुरको मन्थली, सोलीथुममा जन्मनुभएका श्यामप्रसाद शर्माको २०७४ साल बैशाख २४ गते निधन भएको थियो ।
