हेटौंडाः हेटौंडा–२ स्थित नमूना प्रगति बचत तथा ऋण सहकारी संस्था लिमिटेडको २४ औं स्थापना दिवसको अवसरमा सहकारीको सेयर सदस्य परिवारका उत्कृष्ट विद्यार्थीलाई छात्रवृत्ति रकम प्रदान गरिएको छ । आइतबार सहकारीको कार्यालयमै सीमित व्यक्तिको सहभागितामा भएको कार्यक्रममा २०७६ सालको एसएलसी परीक्षामा उत्कृष्ट नतीजा हासिल गरेका प्रसुन लामिछानेलाई ५ हजार ५ सय रुपैयाँ छात्रवृत्तिका लागि प्रदान गरिएको छ ।
प्रसुन हेटौंडा–४ स्थित हेटौंडा स्कूल अफ म्यानेजमेन्टमा कक्षा ११ को परीक्षा दिएर बसेका विद्यार्थी हुन् । सहकारीका अध्यक्ष मीठाराम दाहालको अध्यक्षता तथा सहकारीका सल्लाहकार बद्रिप्रसाद लम्सालको प्रमुख आतिथ्यमा स्थापना दिवसको कार्यक्रम आयोजना गरिएको हो । २ हजार ६ सय १ जना सेयर सदस्य रहेको सहकारीको सेयर पुँजी २ करोड ६८ लाख रुपैयाँ छ । सहकारीले २३ करोड रुपैयाँ ऋण लगानी गरेको र २७ करोड रुपैयाँ बचत संकलन गरेको व्यवस्थापक बद्रिप्रसाद भण्डारीले जानकारी दिनुभएको छ ।
