हेटौंडाः मकवानपुरको भिमफेदी गाउँपालिकामा झोलुङ्गे उद्घाटन भएको छ । आज एक कार्यक्रम गरी गाउँपालिकाका अध्यक्ष हिदम लामाले पुलको उद्घाटन गर्नुभएको हो । गाउँपालिकाले गत आर्थिक वर्ष २०७६/०७७ को २२ लाख बजेटमा पुल निर्माण गरेको हो ।
गाउँपालिकाले वडा नम्बर ३ र ४ जोड्ने गरी राप्ती खोलामा पुल बनाएको हो । झोलुङ्गे पुलको काम सुरु भएको डेढ महिनामै निर्माण सम्पन्न भएको गाउँपालिकाका अध्यक्ष हिदम लामाले बताउनुभयो । पुल निर्माणले वडा नम्बर ३ ज्यालटार र वडा नम्बर ४ पान्द्राङका मानिसहरुलाई आवतजावत गर्न सहज हुने भएको अध्यक्ष लामाले बताउनुभयो । पुल उद्घाटन कार्यक्रममा गाउँपालिकाकी उपाध्यक्ष पार्वती राना र गाउँपालिकाका जनप्रतिनिधिहरुको पनि उपस्थिति रहेको थियो ।
