हेटौंडाः हेटौंडामा जारी मकवानपुर जिल्ला लिग फुटबल प्रतियोगिताको क्वाटर फाइनलका खेलहरु सुरु हुँदैछ । सोमबार हेटौंडा–५ स्थित पिप्ले क्याम्पा रंगशालामा क्वाटर फाइनलका दुई खेल हुन लागेको हो ।
सोमबारको पहिलो खेलमा दिउँसो १ बजे एफसी पोतला र न्यु कम्बाइनबीच प्रतिस्पर्धा हुनेछ । पोतला समुह ‘ए’ बाट ६ खेलमा ४ जीत, एक बराबरी र एक हारसहित १३ अंकका साथ क्वाटर फाइनल प्रवेश गरेको हो भने कम्बाइन समुह ‘सी’ बाट ६ खेलमा ४ जीत, एक बराबरी र एक हारसहित १३ अंक जोडेर समुह उपविजेताका रुपमा क्वाटर फाइनल प्रवेश गरेको हो ।
सोमबारको दोस्रो खेलमा दिउँसो ४ बजे पदमपोखरी युथ क्लब तथा सक्षम युवा क्लब बीच प्रतिस्पर्धा हुनेछ । पदमपोखरी लिग अन्तर्गतका ६ खेलमा ४ जीत र दुई बराबरीसहित १४ अंक जोडेर समुह विजेता बनेर क्वाटर फाइनल प्रवेश गरेको हो भने सक्षम युवा ६ खेलमा ४ जीत, एक जीत र एक हारसहित १३ अंकका साथ क्वाटर फाइनल प्रवेश गरेको हो ।
क्वाटर फाइनलका खेलमा भोलि मंगलबार गोर्खा व्वाइज क्लब र सहिद स्मृति तथा हाँडी खोला युवा क्लब र न्यु डाँफे युवा क्लबबीच प्रतिस्पर्धा हुनेछ । लिगको सेमिफाइनल खेलहरु असोज १० गते हुनेछ भने फाइनल असोज १२ गते हुनेछ । प्रतियोगिताको उपाधि विजेता टिमले एक लाख रुपैयाँसहित शिल्ड, मेडल तथा प्रमाणपत्र प्राप्त गर्नेछन् भने उपविजेता टिमले ५० हजार रुपैयाँसहित शिल्ड मेडल तथा प्रमाणपत्र प्राप्त गर्नेछन् ।
