हेटौंडाः आउँदो शुक्रबारबाट सुरु हुन लागेको मकवानपुर जिल्ला लिग फुटबल प्रतियोगितामा सहभागी हुने गोर्खा ब्वाईज क्लबलाई हेटौंडा–५, स्थित हेटौंडा सिटी कलेजले सहयोग गरेको छ । कलेजले गोर्खा ब्वाईजलाई ३० थान ट्रयाक सुट सहयोग गरेको हो । कलेजका प्रिन्सीपल श्रीबहादुर कार्कीले आइतबार कलेजमै क्लबका अधिकारीलाई ट्र्याक हस्तान्तरण गर्नुभयो ।
कलेजले संस्थागत सामाजिक उत्तरदायित्वअन्तर्गत क्लबलाई सहयोग गरेको जनाएको छ । गोर्खा ब्वाइजलाई आइतबार नारायणी कलेजले पनि जर्सी सहयोग गरेको छ । आइतबार कलेजमा एक समारोहका बीच कलेजका प्रिन्सीपल रघुनाथ खरालले जिल्ला लिग फुटबलमा सहभागी हुन गोर्खा ब्वाइज क्लबलाई करिब २५ हजार रुपैयाँ बराबरको २५ थान जर्सी सहयोग गर्नुभएको हो । क्लबमा क्याप्टेन अलित देउला, गोलरक्षक पुजन खड्का र टिम म्यानेजर सञ्जिव देउलालाई प्रिन्सीपल खरालले जर्सी हस्तान्तरण गर्नुभएको हो ।
जिल्ला लिग फुटबलमा सहभागी हुनका लागि नियमित प्रशिक्षण गराइरहेको क्लबका सल्लाहकार युवराज लामाले जानकारी दिनुभएको छ । क्लबले लिगमा सहभागी हुन खेलाडीहरुलाई नियमित प्रशिक्षण गराइरहेको कारणले पनि कलेजले जर्सी प्रदान गरेको उहाँले बताउनुभयो । क्लबका खेलाडीहरुलाई प्रतियोगिताको अनुभव गराउनका लागि लिगमा सहभागी हुन तयारी गरिरहेको अन्य क्लबहरुसँग पनि अभ्यास खेल खेलाइरहेको उहाँले बताउनुभयो । क्लबले मैत्रीपूर्ण प्रतियोगितामा प्रतिभा युवा क्लब र इन्टरनेट सिटी क्लबसँग अभ्यास खेल खेलिरहेको उहाँको भनाई छ ।
