हेटौँडा ः मकवानपुरको थाहा नगरपालिकाले विपद् प्रभावित क्षेत्रलाई समेट्ने गरी चालु आर्थिक वर्षको बजेट संशोधन गरेको छ । थाहा नगरपालिकाको शुक्रबार सम्पन्न नगरसभाले विपद्बाट क्षति पुगेका महत्वपूर्ण सडक पूर्वाधारको मर्मतका बजेट शिर्षक संशोधन गरेको हो ।
नगरसभाले विपद्बाट क्षति व्यहोरेको सडक पूर्वाधार खुलाउन तथा मर्मतका लागि १ करोड ३६ लाख रुपैयाँ बजेट रकमान्तर गर्ने गरी बजेट संशोधन गरेको थाहा नगरपालिकाका प्रमुख विष्णुबहादुर विष्टले जानकारी दिनुभयो । उहाँका अनुसार उक्त रकम विपद् प्रभावित सडक पूर्वाधारको अवरोध हटाउन लागेको खर्चको भुक्तानी गर्ने गरी संशोधन गरिएको हो ।
नगरसभाले केही आयोजनाहरु कार्यान्वयनका लागि संशोधन गर्ने निर्णय गरेको उहाँले बताउनुभयो । कार्यपालिका र विभिन्न विषयगत समितिले गरेका निर्णयहरु पनि नगरसभाबाट अनुमोदन गरिएको प्रमुख विष्टले जानकारी दिनुभयो । नगरसभाले चालु आर्थिक वर्षको अर्धवार्षिक प्रतिवेदन माथि छलफल गर्दै स्वीकृत गरेको छ ।
