हेटौँडाः हेटौँडामा शुक्रबार र शनिबार दुई दिन रक्तदान कार्यक्रम भएको छ । कार्यक्रममा ७१ जनाले रक्तदान गरेका छन् ।
शुक्रबार नेपाल विद्युत प्राधिकरणको ३९ औं वार्षिकोत्सवको अवसरमा हेटौँडा वितरण केन्द्रको आयोजनामा रक्तदान कार्यक्रम भएको हो । कार्यक्रममा ४८ जनाले रक्तदान गरेका थिए भने शनिबार हेटौँडा–८ स्थित लाङ्टाङ बाल समूहको आयोजनामा रक्तदान कार्यक्रम भएको हो । बाल समूहको आयोजनामा भएको कार्यक्रममा २३ जनाले रक्तदान गरेका छन् । रक्तदान कार्यक्रममा रक्तसञ्चार केन्द्र हेटौँडाको प्राविधिक सहयोग रहेको थियो ।
यही साउन ३० गते हेटौँडा–२ स्थित प्रतिफल बचत तथा ऋण सहकारी संस्था लिमिटेडले वार्षिकोत्सवको अवसरमा रक्तदान कार्यक्रम गर्दैछ । सहकारीले वार्षिकोत्सवको अवसरमा हरेक वर्ष रक्तदान कार्यक्रम गर्ने गरेको छ । यस्तै आगामी भदौ २ गते हेटौँडा–६ स्थित कृष्ण प्रणामी मन्दिर र भदौ ८ गते हेटौँडा–४ स्थित कृष्ण प्रणामी मन्दिरमा पनि रक्तदान कार्यक्रम आयोजना गरिँदै छ ।
