हेटौंडाः मकवानपुरको बकैया गाउँपालिका वडा नम्बर ५, पावसस्थित सिमात खोलामा एक पुरुष मृत अवस्थामा फेला परेका छन् । मृत फेला पर्नेमा बकैया–५ स्थित राजदमारका ६० वर्षीय आशा काजी दोङ रहेको जिल्ला प्रहरी कार्यालय मकवानपुरले जनाएको छ ।
आइतबार दिउँसो १२ बजेर १५ मिनेटको समयमा दोङ उक्त खोलामा घोप्टो परी तैरिरहेको अवस्थामा मृत फेला परेको जनाएको छ । घटनास्थलमा खटिनुभएका प्रहरी चौकी गरगरेका प्रहरी सहायक निरक्षक सन्तु कुमार लामाका अनुसार दोङ बिहान १० बजेतिर बैंकमा आउन घरबाट निस्केका थिए । हाल घटनाको प्रकृति हेर्दा कुनै शंकास्पद नदेखिएपनि घटनाबारे थप अनुसन्धान गरिने उहाँले बताउनुभयो । दोङले मदिरा सेवन गरेको बुझिएको छ ।
मृतक दोङ दुध डेरीबाट आउने पैसा लिन खोला तरेर बैंक निस्किएको प्रहरीले जनाएको छ । शवको मुचुल्काका लागि तयारी भइरहेको र मुचुल्का पश्चात शव पोष्टमार्टमका लागि हेटौंडामा ल्याउने जनाएको छ ।
