हेटौँडाः रामेछाप जिल्लाको गोकुलगंगा गाउँपालिका–६, फर्पुमा पहिरोमा पुरिएर ३ जनाको मृत्यु भएको छ । बिहीबार बेलुका ८ बजेर ५० मिनेटको समयमा बिमान तामाङको घर माथिबाट खसेको पहिरोले पुरिएर घर भित्र रहेका ३ जना बेपत्ता भएको बागमती प्रदेश प्रहरी कार्यालय हेटौँडाले जानकारी दिएको छ ।
पहिरोले पुरिएर बिमान तामाङको १८ वर्षीया छोरी सीता तामाङ, छिमेकीे १५ वर्षीया छोरी आशिका दोङ र १३ वर्षीया लक्ष्मी तामाङको मृत्यु भएको प्रहरीले जनाएको छ । पहिरो खसेर मानिस पुरिएको खबर प्राप्त हुनासाथ प्रहरी टोली खटिएर खोजी गर्दै जाँदा बिहीबार राती १० बजेर १५ मिनेटको समयमा तीनै जना घट्नास्थलमा मृत फेला परेको प्रहरीले जनाएको छ ।
यस्तै चितवन जिल्लाको कालिका नगरपालिका–१०, तीन दोभानमा खोलाले बगाई बेपत्ता भएका पुरुष मृत फेला परेका छन् । मृत फेला पर्नेमा ३३ वर्षीय गम्भीर चेपाङ रहेको बागमती प्रदेश प्रहरी कार्यालय हेटौँडाले जानकारी दिएको छ । बिहीबार सिद्धिबजारबाट घर तुई कराङ जाने क्रंममा कयर खोलाले बगाउँदा चेपाङ बेपत्ता भएका थिए । बेपत्ता चेपाङको प्रहरी र स्थानीयले खोजी गर्दै जाँदा शुक्रबार बिहान ६ बजेको समयमा निपुवाटारस्थित खोलाको किनारमा मृत अवस्थामा फेला परेको प्रहरीले जानकारी दिएको छ ।
