हेटौंडाः मिस नेपाल २०२४ को ग्राण्ड फिनाले आगामी साउन १९ गते ललितपुरमा आयोजना हुँदैछ । प्रतियोगितामा उपाधिका लागि २६ जनाले प्रतिस्पर्धा गर्दैछन् ।
प्रतियोगितामा मकवानपुरको हेटौंडा–५, पिप्लेकी रोशनी दाहालको पनि सहभागिता रहेको छ । सानैदेखि मिस नेपालमा सहभागी हुने इच्छा बोकेकी २४ वर्षीया दाहालले हेटौंडा स्कूल अफ म्यानेजमेन्टबाट कम्प्युटर एप्लिकेसनमा स्नातक तह उत्तीर्ण गर्नुभएको छ ।
मकवानपुर बहुमुखी क्याम्पसका सहप्राध्यापक केशव दाहालको पहिलो सन्तान रहेकी रोशनीका आमा पनि शिक्षण पेशामा आवद्ध हुनुहुन्छ । रोशनीले आफू मिस नेपाल भइसकेपछि कम्प्युटर प्रविधिलाई पेशाको रुपमा अङ्गाल्ने योजना बनाउनुभएको छ ।
दाहालले आफूलाई मिस नेपालको विजेता बनाउन खल्ती एपमार्फत् प्रतिस्पर्धी नम्बर १८ मा भोट गर्न आग्रह पनि गर्नुभएको छ । प्रतियोगितामा देशभरबाट डेढ सय जनाले आवेदन दिएका थिए । जसमध्ये २६ जनालाई मात्र प्रतिस्पर्धाका लागि छनौट गरिएको हो ।
