हेटौंडाः जिल्ला ब्याडमिन्टन संघ मकवानपुरले १५ वर्ष मुनि (अन्डर–१५) उमेर समूहका चार जना खेलाडी छनौट गरेको छ । शनिबार थानाभर्याङस्थित कभर्ड हलमा आयोजित खेलाडी छनौट कार्यक्रमबाट दुई जना पुरुष र दुई जना महिला खेलाडी छनौट गरेको संघका सदस्य नरेन्द्र मोक्तानले जानकारी दिनुभयो ।
आगामी जेठ ३० गतेदेखि ३२ गतेसम्म राष्ट्रिय खेलकुद परिषद्को आयोजनामा अन्डर–१५ ब्याडमिन्टन प्रतियोगिता आयोजना हुँदैछ । प्रदेशस्तरीय छनौटका लागि महिलातर्फ हेटौंडा–९ की प्रसिद्धि मिश्र र हेटौंडा–६ की सुजला सापकोटा छनौट भएका छन् । यस्तै, पुरुषतर्फ हेटौंडा–८ का स्वरुपराज खत्री र बागमती गाउँपालिकाका सुदीप मोक्तान छनौट भएका छन् ।
छनौट प्रतियोगितामा पुरुषतर्फ २० जना र महिलातर्फ १० जना सहभागी भएको सदस्य मोक्तानले बताउनुभयो । सहभागीहरुबीच प्रतिस्पर्धा गराएर विजेता र उपविजेतालाई छनौट गरिएको उहाँले बताउनुभयो । खेलाडी छनौट कार्यक्रममा संघका वरिष्ठ उपाध्यक्ष विजय सिंह ठकुरी, सचिव प्रल्हाद उप्रेती र प्रशिक्षक अभिषेक बोसलगायतको उपस्थिति रहेको थियो ।
