हेटौँडाः हेटौँडा–२ स्थित मकवानपुर बहुमुखी क्याम्पसमा अध्ययनरत विद्यार्थीले उत्कृष्ट नतिजा हासिल गरेका छन् । त्रिभुवन विश्वविद्यालयको परीक्षा नियन्त्रण कार्यालयले बिहिबार सार्वजनिक गरेको बीबीए पाँचौं सेमेस्टरको नतिजामा एकसाथ ५ जना विद्यार्थीले ४ जीपीए ल्याएका हुन् । मकवानपुर बहुमुखी क्याम्पसकी इरा लामा, इशा श्रेष्ठ, क्रिष्टिना दाहाल, सैय्यद अतिफा हसन र सैय्यद अफिफा हसनले ४ जीपीए ल्याएका हुन् ।
पाँचौं सेमेस्टरमा ३३ जना विद्यार्थीले परीक्षा दिएका थिए । परीक्षामा सहभागी सबै विद्यार्थीको राम्रो नतिजा आएको मकवानपुर बहुमुखी क्याम्पसको बीबीए कार्यक्रम निर्देशक मधुकुमार सिंहले जानकारी दिनुभयो । मकवानपुर बहुमुखी क्याम्पसका बीबीए, बीबीएम कार्यक्रममा निरन्तर राम्रो नतिजा हासिल भइरहेको उहाँको भनाइ छ । विद्यार्थीको राम्रो मिहिनेत, प्राध्यापकहरुको सहयोग र अभिभावकको पनि नियमित निगरानी र सहयोगले राम्रो नतिजा हासिल भएको सिंह दावी गर्नुहुन्छ । बीबीए र बीबीएमसँगै अहिले मकवानपुर बहुमुखी क्याम्पसले शिक्षाशास्त्र संकायमा पनि सूचनाप्रविधि सम्बन्धी कार्यक्रम सञ्चालन गरिरहेको छ ।
