हेटौँडाः हेटौँडाका सञ्जीव अर्याल विभागीय टोली नेपाल पुलिस क्लबमा आवद्ध भएका छन् । हेटौँडा–५, शान्तिनगरका अर्यालले गएको माघ २ गतेदेखि नेपाल पुलिसबाट व्यावसायिक फुटबल खेल्ने सम्झौता गर्नुभएको हो । अर्यालले अहिले आफुले यो सिजनमा विभिन्न प्रतियोगिता खेल्नका लागि क्लबसँग सम्झौता गरेको र बाँकी पछि थप गरिने बताउनुभयो ।
१७ वर्ष उमेर समूहको राष्ट्रिय टिमबाट खेलिसक्नु भएका अर्यालले २०७५ सालमा मछिन्द्र क्लबबाट “ए” डिभिजन लिगमा डेब्यु गर्नुभएको थियो । २०७८ सालमा ए डिभिजन क्लब एनआरटीमा आवद्ध हुनुभएका अर्यालले डिफेन्डिङ पोजिसनमा खेल्नुहुन्छ । अर्यालले हेटौँडा फुटबल एकेडेमीबाट पनि करिब ६ वर्षदेखि खेल्दै आउनुभएको थियो । पिप्ले क्लबबाट फुटबल प्रशिक्षण लिन सुरु गर्नुभएका अर्यालले हेटौँडा फुटबल एकेडेमीको कप्तानी समेत गर्नुभएको छ ।
