हेटौँडाः नगरस्तरीय शैक्षिक समन्वय समिति हेटौँडाको नयाँ नेतृत्व चयनमा सहमति हुन सकेको छैन । वार्षिक साधारणसभा भएको दुई साता बितिसक्दा पनि नेतृत्व चयनमा सहमति हुन नसकेको हो । समितिको अध्यक्षमा ५ जना आकांक्षी छन् भने १४ जना सदस्यका लागि २७ जना आकांक्षी छन् । समितिको साधारणसभा असार ८ गते भएको थियो ।
२०४८ सालमा स्थापित नगरस्तरीय शैक्षिक समन्वय समितिमा अहिलेसम्म नेतृत्वका लागि निर्वाचन भएको छैन । यसअघि सहजै सहमतिमा नयाँ नेतृत्व स्थापित हुँदै आएको सन्दर्भमा समितिले निर्वाचनसम्बन्धी कार्यविधि नै नबनाएकोले सकेसम्म सहमतिको प्रयास गरिएको निवर्तमान अध्यक्ष सागरप्रसाद खतिवडाले जानकारी दिनुभएको छ । निर्वाचनमै जानुपर्ने भयो भने निर्वाचन कार्यविधि बनाइने निवर्तमान अध्यक्ष खतिवडाले बताउनुभएको छ । नगरस्तरीय शैक्षिक समन्वय समितिको अध्यक्षमा केशव सञ्जेल, भोगेन्द्र लुइटेल, नारायणप्रसाद भण्डारी, खेमराज लामिछाने र पुरुषोत्तम आचार्य आकांक्षी हुनुहुन्छ ।
