हेटौँडाः गत चैत्र १७ गतेदेखि २९ गतेसम्म संचालन भएको माध्यमिक तह परीक्षा (एसईई) को नतिजा बिहीबार सार्वजनिक गरिएको छ । सार्वजनिक गरिएको नतिजाअनुसार मकवानपुर जिल्लाको हेटौंडा–७ स्थित तासिर ईङ्लिस बोर्डिङ स्कुलकी एक छात्राले मात्र ४ जीपीए ल्याउन सफल भएका छन् । मकवानपुर जिल्लामा परीक्षामा सहभागी ५ हजार ८ सय १२ जनामध्ये मकवानपुरकी डाफिन राइकाले ४ जीपीए ल्याउन सफल भएका हुन् ।
यस्तै ३.६ देखि ४ जीपीए ल्याउने एक सय ७९ जना, ३.२ देखि ३.६ जीपीए ल्याउने ५ सय ४० जना, २.८ देखि ३.२ जीपीए ल्याउने ७ सय २७ जना विद्यार्थी रहेका छन् । २.४ देखि २.८ जीपीए ल्याउने ९ सय ५८ जना, २ देखि २.४ जीपीए ल्याउने १ हजार ३ सय ३६ जना रहेका छन् । १.६ देखि २ जीपीए ल्याउने १ हजार ५ सय १९ जना, १.६ जीपीए भन्दा कम प्राप्ताङ्क भएका विद्यार्थीको संख्या ४ सय ६६ जना रहेका छन् । परीक्षामा ८७ जना विद्यार्थी अनुपस्थित भएका थिए ।
