हेटौँडाः प्रहरीले लागुऔषध गाँजासहित ४ जनालाई पक्राउ गरेको छ । पक्राउ पर्नेमा मकवानपुरको मनहरी गाउँपालिका–८, ज्यामिरेका ३४ वर्षीय चन्द्र बहादुर मोक्तान, झापाको मेची नगरपालिकाका ४६ वर्षीय शंकर दाहाल, ३४ वर्षीय बिनोदकुमार र रौतहटको चन्द्रपुर नगरपालिकाका २४ वर्षीय अर्जुन गौतम रहेको जिल्ला प्रहरी कार्यालय बाराले जानकारी दिएको छ ।
बुधबार बिहान बारा जिल्लाको निजगढ नगरपालिका–८ मा पूर्व–पश्चिम लोकमार्ग सडक खण्डको उनासी पुलस्थित ईलाका प्रहरी कार्यालय निजगढबाट खटिएको प्रहरी टोलीले हेटौँडाबाट काँकडभिट्टातर्फ जाँदै गरेको मे १ ख २३२२ नम्बरको यात्रुबाहक बसलाई रोकी सुरक्षाजाँच गर्ने क्रममा लागुऔषध गाँजा बरामद गरेको हो । प्रहरीले बसको सिटमुनी स्याउको कार्टुनभित्र लुकाई छिपाई राखेको अवस्थामा अवैध लागूऔषध गाँजा १३ किलो ५०० ग्राम बरामद गरेको जनाएको छ । प्रहरीले बस, लागूऔषध गाँजा र गाँजा ओसारपसारमा संलग्न रहेका ४ जनालाई नियन्त्रणमा लिई अनुसन्धान गरिरहेको जनाएको छ ।
