हेटौंडाः लागूऔषध गाँजा र चरेशसहित ३ जनालाई मकवानपुर प्रहरीले पक्राउ गरेको छ । २० किलो ५ सय ग्राम लागुऔषध चरेस र १० किलो गाँजाको धुलोसहित ३ जनालाई प्रहरीले बुधबार बिहान साढे ३ बजेको समयमा पक्राउ गरेको जनाएको छ ।
जिल्ला प्रहरी कार्यालय मकवानपुरको विशेष टोली र ईलाका प्रहरी कार्यालय मनहरीबाट प्रहरी निरीक्षक प्रकाश थापाको कमाण्डमा संयुक्त रुपमा खटिएको प्रहरी टोलीले मनहरी–८, सिमपानीमा चितवनबाट हेटौंडातर्फ आउँदै गरेको लु ३ च ९७४ नम्बरको पिकअप गाडीबाट लागूऔषध बरामद गरेको हो ।
लागूऔषधसहित प्रहरीले राक्सिराङ गाउँपालिका–६ का ३३ वर्षीय सन्त बहादुर थिङ, २७ वर्षीय ललित बहादुर थिङ र चितवन जिल्लाको राप्ती नगरपालिका–११, भण्डराका २८ वर्षीय राम बहादुर तामाङलाई पक्राउ गरेको प्रहरीले जनाएको छ । प्रहरीले लागूऔषध चरेस, गाँजाको धुलो, पिकअप गाडीसहित पक्राउ परेका तीनैजनालाई थपअनुसन्धान भइरहेको प्रहरीले जानकारी दिएको छ ।
